情侶越放閃越無安全感？！多po相曬恩愛行為兩極 究竟係真幸福定假象？

大家身邊有無啲朋友成日po相放閃，又或者其實自己都鍾意狂曬恩愛？就算唔係大時大節，平日打開Facebook、IG張張都係情侶相，Caption永遠都係超肉麻骨痺，但都唔駛眼紅人住，佢哋隨時係因為缺乏安全感先會咁做啊！

Photo from Shutterstock

澳洲兩性學專家妮基（Nikki Glodstein）發現，網上大曬恩愛嘅情侶當中，有部分人其實因為對感情極度缺乏安全感，所以需要藉着「po相放閃」此舉動，嚟證明比自己同外人睇，「其實我哋係好sweet好恩愛㗎」！

Photo from Shutterstock

情況就好似一個人如果喺愛情上缺乏信心，往往就會想用辦法去彌補或增加自己嘅安全感，嚟證明「呢段感情其實好堅固」，而喺社交媒體上公開大曬恩愛就係其中一個方法。

Photo from Shutterstock

妮基亦有解釋，呢類型嘅人其實已經喺感情上遇到迷茫同不安，所以佢哋需要嘅唔係藉着po相去紀錄二人生活嘅日常小點滴，而係透過外人嘅讚好同留言，令自己增加安全感同信心之餘，都係想暗地裡話畀自己聽，「我哋嘅關係好正常」，簡單呢個就似係「自己呃自己」。

Photo from Shutterstock

除咗以上原因會令部分情侶經常po相放閃，仲有一部分係因為對另一半有擔憂啊！有部分人可能試過喺前段感情中出現第三者，又或者另一半經常有異性纏身等，過往或現有感受令人產生出一種「另一半隨時被人搶走」嘅憂慮，所以要公開放閃以「宣誓主權」，高調曬恩愛而增加自己嘅安全感同地位。

Photo from Shutterstock

妮基更指出，再嚴重者甚至會喺合照時裝出一副甜蜜恩愛嘅模樣，影好一張滿意嘅合照後，隨即將注意力放於po相發文上，其後一直都只着重於有幾多人讚好及留言，只重視自己同另一半於社交媒體上嘅形象，現實中兩者關係反而會因此而越來越糟糕。

Photo from Shutterstock

其實經常性po相放閃，一方面都證明咗放閃者可能係較無自信、自卑，又或者鍾意同人比較，例如比較同其他人邊個恩愛啲、邊個另一半錫自己多啲等等，同時都反映咗放閃者可能佔有慾同控制慾都比較強！

Photo from Shutterstock

當然亦有部分人係因為關係穩定又甜蜜，所以鍾意喺社交媒體上紀錄雙方嘅生活點滴，呢類型嘅情侶通常較着重紀錄而非曬命，所以其實到底係真恩愛定純粹營造假象，我諗真係只有當事人先會知道啊！

Photo from Shutterstock

其實情侶間真係出現問題，應該雙方坐底好好傾吓，一齊正視問題並搵出解決方法，而非以po相放閃方式自欺欺人，長此下去只會治標唔治本，問題總有一日會爆出嚟。

所以喺時候檢討下雙方關係，一齊面對一齊解決，即使偶爾會鬧下交，好過問題積積埋埋，到有日大家都補救唔到而導致分手收場！

資料來源：Personality and Social Psychology Bulletin

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）