超清澈水藍色地底湖！日本3大鐘乳洞之一 神秘地底好靚好夢幻！

相信近幾年日本已經成為咗港人常去嘅旅遊熱點，但再靚嘅地方如果去親都係行街購物，去多幾次可能都會覺悶啊！如果想接觸多啲大自然同具歷史價值嘅地方，大家下次去日本不妨花多少少時間行遠啲，認識真正嘅日本與大自然之美！

Photo from FB@Ryusendo Cave 龍泉洞

位於東北岩手縣嘅鐘乳洞「龍泉洞」，與秋芳洞及龍河洞均列入日本三大鐘乳洞，而龍泉洞為一石灰岩洞，於1938年與棲息於洞內嘅蝙蝠同獲指定為國家天然紀念物，所以係極具歷史價值！

Photo from FB@Ryusendo Cave 龍泉洞

根據目前所知，龍泉洞長達3,600公尺，其中700公尺已對外開放給遊客參觀。所發現嘅地底湖共8座，其中3座亦有對外開放。唔好以為入到去得少少嘢睇好悶，入面即使局部開放，都已經好大好靚！足夠令大家對大自然奇觀嘆為觀止！

Photo from FB@Ryusendo Cave 龍泉洞

龍泉洞地底湖係世界知名高透明度地底湖之一，湖水藍得嚟相當清澈，即使地底湖有成38公尺深，不論湖形、湖底定岩石都依然清晰可見！加埋水底設置嘅LED燈，真係好靚好神奇！

Photo from FB@Ryusendo Cave 龍泉洞

首兩座湖都係湖深約38公尺，第3座湖則湖深98公尺，即係大約有成30層樓咁高啊！大家睇完第三座湖之後，可以向上爬上展望台，然後直接向下望第一地底湖，絕對係靚到難以形容！

Photo from FB@Ryusendo Cave 龍泉洞

沿路行過嘅地方都係天然形成㗎，除咗欣賞不同嘅水藍色嘅地底湖之餘，唔好忘記都要睇下四周嘅鐘乳石啊，同樣好靚好特別，鍾意睇大自然奇觀嘅朋友一定要嚟睇下！

Photo from FB@Ryusendo Cave 龍泉洞

而除咗可參觀地底湖外，園內亦設有餐廳、科學館、青少年旅行村及溫泉飯店等地方，有得食有得住，絕對方便大家旅行參觀！

Photo from FB@Ryusendo Cave 龍泉洞

而龍泉洞每年均為舉辦4個大型祭典，包括5月龍泉洞祭典、7月龍泉洞夏季嘉年華、11月龍泉洞秋季嘉年華及1月龍泉洞水典，而一般指定時間都會有人例行活動供遊客參加，大家可以到官網瀏覽活動詳情，mark實指定日子出發啦！

Photo from FB@Ryusendo Cave 龍泉洞

Photo from FB@Ryusendo Cave 龍泉洞

雖然前往龍泉洞嘅所需時間頗長，但交通方法都有很多種，大家可以從「盛岡站」坐東北巴士前往「龍泉洞前」，又或者乘坐三陸電車，於小本站落車，再轉乘巴士前往龍泉洞，但大家記得要多少少時間啊，因為車程都不短！「盛岡站」坐東北巴士需是大約2小時多，而小本站轉乘巴士亦需約半小時。

Photo from FB@Ryusendo Cave 龍泉洞

已計劃好去日本嘅大家可以放心，龍泉洞全年無休，隨時都有得去！而且票價相當便宜，成人為1,000円位（約港幣70元），而中小學生則500円位（約港幣35元），絕對值得一遊啊！

圖片來源：FB@Ryusendo Cave 龍泉洞

龍泉洞園區
開放時間：8:30am - 5pm （5月-9月為8:30am - 6pm)
官網：http://www.iwate-ryusendo.jp/tw/

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）