唔夠錢/唔見銀包唔洗驚！港鐵設賒票制度 其他交通工具又有無？

唔知大家有無試過唔見銀包又得自己人個，或者銀包唔夠錢搭車呢？其實港鐵係設有一個「賒票」制度，但喱個制度未必好多人都知，所以大家知道之後，日後有咩唔好彩唔夠錢搭車，都千祈唔好咁傻行路或者問路人拎啊！

Photo from FB@MTR Service Update

港鐵「繳付車費協議」其實一直存在，係為咗方便一啲帶唔夠錢、唔見或被偷銀包嘅市民而設嘅，若乘客有需要，可以到任何一個站嘅客務中心告知職員，填寫「繳付車費協議」，提供簡單嘅個人資料，包括中英文地址、電話、身分證號碼等，並承諾喺7日內繳回車費，就可以有張單程車票。

Photo from FB@MTR Service Update

但記住個服務原意係為咗方便有需要嘅乘客，大家記得唔好濫用，甚至企圖使用呢個服務後唔還錢啊，因為咁係有可能要負上刑事責任。

Photo from FB@MTR Service Update

之前港鐵流出「賒票機制」下嘅騙徒黑名單，有幾40多名濫用者嘅部分個人資料被公開，雖然好多人斥港鐵咁做或會侵犯私隱權，但同時都要記住千祈唔好濫用良心機制啊！

Photo from FB@MTR Service Update

而除咗港鐵之外，咁其他交通工具又有無呢個制度呢？九巴同電車係無「繳付車費協議」嘅，所以如果真係無足夠金錢搭車，都係揀返港鐵比較方便。

Photo from FB@KMB 九巴專頁

天星小輪一樣都係無例明有「賒票機制」，但如果乘客唔見銀包或因事無足夠金錢比船費，都可以試下向收費閘職員求助，只要出示身分證明文件，留低個人聯絡資料，並承諾喺7日內繳回船費，職員都會考慮酌情處理！

Photo from FB@天星小輪

咁以後萬一唔見銀包或者帶唔夠錢，都唔駛咁慌失失擔心返唔到屋企，又要尷尷尬尬咁問人借錢啦！

圖片來源：FB@MTR Service Update、天星小輪、KMB 九巴專頁

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）