預料2019年上映！迪士尼真人版《阿拉丁》率先睇！還原度有幾高先？

迪士尼多個部經典動畫都相繼開拍真人版，1992年慨原著動畫《阿拉丁》今年都落實開拍真人版改篇大電影！電影早前落實主角人選，但劇情、製作詳情就未有公佈。

今日有迪士尼網站就發表疑似真人版《阿拉丁》海報，同埋披露電影改編詳情。

呢張網上最新流傳嘅疑似電影真人版海報，見到阿拉丁企喺沙漠中間，仲寫住「A Whole New World Awaits」，唔通經典主題曲「A Whole New World」都會重現？

Photo from 只是迪斯尼

重製音樂經典

係都唔奇！事關「A Whole New World」原曲作曲家Alan Menken繼續為今次電影編曲，浪漫神曲「A Whole New World」應會有新版本！

另外Alan仲透露會同奧斯卡金像獎音樂電影《La La Land》作曲家合作兩首新歌，嘩！兩大音樂猛人破天荒合作，相信真人版《阿拉丁》嘅音樂必定有一定水準！

演員陣容超驚喜

劇情同樣以《阿拉丁與神燈》為藍本，講述窮小子阿拉丁喺「燈神」幫助下，冒充王子再奪得茉莉公主芳心嘅愛情故事。

動畫變成真人，演員當然係重點！男主角為26歲埃及型男Mena Massoud，驟眼睇同動畫版阿拉丁好似樣！

Photo from Mena Massound

迪士尼選用阿拉伯裔演員演繹阿拉丁，還原原著味道。

Photo from 梅納馬蘇德

茉莉公主由25歲英國演員Naomi Scott演出，本身係英印混血兒嘅佢帶點異國風情，扮演阿拉伯公主都好有感覺。

Photo from Screen Review

不過講到最最最驚喜都係《Men In The Black》韋史密夫扮演燈神！

韋史密夫變成身藍色嘅燈神到底係點樣？雖然未有得睇住！但唔少外媒已經P咗多個「惡搞造型照」，成個藍精靈咁款！笑鬼死！

Photo from whatculture.com

Photo from PopMalt

著名沙漠取景

靚人有啦，咁靚景呢？故事設定喺虛構嘅阿拉伯城市阿格拉巴，為營造呢個夢幻阿拉伯國度，沙漠場景將會喺約旦著名嘅瓦地倫沙漠（Wadi Rum Desert）拍攝。

瓦地倫沙漠以酒紅色沙漠同圓形「星空帳幕」聞名世界，亦係《星戰》火星場景取景地。

Photo from shutterstock

Photo from shutterstock

電影預計2019年5月24日於美國上映，忠粉們請拭目以待！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）