蘇黎世景點重點推介必去5大極俱代表性景點超靚貨櫃市集俾你打卡+濕平！

By Charlotte on 23 Aug 2018

Editor

如果脂肪能賺錢，也許已養起全世界。妄想只吃只睡能過一生，看來還要多多努力。喜愛旅遊，喜歡到處尋找美食。每天也要化妝，再累也要戴con出門，大概是唯一的堅持。

瑞士可能係好多人都夢寐以求嘅旅遊國家，無論你已經plan咗會去定已經放咗落travel bucket list，都一定要睇下小編嘅介紹喇！其實瑞士唔係得雪山嘅！

1. 瑞士國家博物馆(Schweizerisches National Museum)

除咗宏偉嘅大教堂，國家博物館都係去旅遊時好值得去嘅地方黎㗎！而蘇黎世嘅呢個瑞士國家博物館，就係一個俾你了解到瑞士人嘅創意嘅地方。

特別又有創意嘅地方係，博物館以嶄新嘅展覽方式黎詮釋舊展品。例如將平時正方嘅展櫃改變成多角形，以瑞士國旗紅、白色為基調，而且展品周圍仲放咗鏡，俾參觀者從多角度觀賞展品不同美態。

博物館嘅建築好似法國文藝復興古堡一樣，入面有超多庭院同花園，而且仲以瑞士歷史各時期嘅建築特色去表達。

除咗似古堡咁靚，呢度仲係瑞士國內珍藏品最多嘅博物館。會堂入面有一座兩層高嘅木平台，底層展示咗中世紀混亂時代嘅畫作同文物，闡述時代面貌，睇完就可以了解呢個擁有多民族山地國家嘅多重價值。

2. 班霍夫大街 Bahnhofstrasse

講到shopping，一定要去歐洲最長嘅購物大道，見識下世上最昂貴嘅購物街之一 - 班霍夫大街喇！大街總共長1.4公里，由蘇黎世火車站（Zürich Hauptbahnhof）前開始，穿過利馬特河（Limmat）左岸嘅商業中心區，到蘇黎世湖畔嘅布林克利廣場（Bürkliplatz）為止。

而且最特別嘅係大街上，除咗人同電車，其他汽車係唔可以駛入嘅，為嘅係確保空氣品質，兩旁仲種滿咗椴樹，真係好有feel，好靚㗎！

無論係奢侈品店、時裝店、銀行、精品潮牌店、各大名牌鐘錶、珠寶設計、古董鑒定公司抑或係百貨商場，都佈滿大街上。

3. 蘇黎世城西
蘇黎世城西嘅第五區活化之前係一個工廠區，嗰度有一條火車軌天橋，橋下面有一排獨立店舖，唔少充滿特色又型格嘅品牌進駐。

Freitag

好似呢個咁，韓國有個必去打卡嘅貨櫃市集，蘇黎世城西嘅第五區都有個以貨櫃搭建嘅Freitag旗艦店㗎！Freitag係一個採用回收膠料製作郵差包嘅著名品牌。

Im Viadukt

Im Viadukt就係頭先提及嘅鐵道橋，「Viadukt」德文意思係「高架橋」，拱形嘅橋底下，有一個室內市場，入面佈滿一個個約1000呎嘅圓頂

入面係唔同嘅商店、食肆同工作間，好似麵包店、咖啡座、藝廊、精品店辦公室等等。而外邊就有綠化嘅休憩空間。

Frau Gerolds Garten

另外亦都有一個大型花園，每年7月就開始熱鬧，有工作坊、美食啤酒仲有小型秋季市集，入面有好多年輕人經營嘅自家設計時裝等等。

不過，雖然依家去得蘇黎世黎都聖誕，但係唔洗擔心市集會完㗎！因為聖誕期間將會再舉辦市集，到時記得留意www.montagsmarkt.ch啦！另外，如果打算春天去蘇黎世嘅朋友，可以留意下佢地嘅美食節www.fraugerold.ch。

4.林登霍夫山丘 (Lindenhof)

Lindenhof嘅意思係菩提樹的中庭，可以話係蘇黎世市中心嘅一遍綠地。雖然係一個小山丘，但唔洗擔心，都只係需要行一條細細條嘅樓梯就上到去。

上去可以古羅馬時期嘅人嘅角度去觀望利馬特河，因為當時呢度係一個稅關嘅地方，曾經興建小堡壘黎監視利馬特河㗎！

5. FIFA世界足球博物館 (FIFA World Football Museum)

無論你好唔好足球，都一定要去FIFA世界足球博物館見識下！話晒國際足協（FIFA）總部都係設於蘇黎世，氣氛都特別濃厚啦！

入面會有個叫「The Rainbow」嘅區域，擺放211個FIFA成員隊伍嘅球衣㗎！仲有超級震撼，有成3000平方米大，放有約1000件展品嘅展館。

除咗球衣同展品，當然仲有互動區同玩遊戲嘅互動學習區啦！

以上介紹嘅5個景點，都係蘇黎世非常著名㗎！快啲mark底喇！