世界第一絕美小鎮 彩色島布拉諾 色彩控打卡必到之地

「水上之都」威尼斯係歐洲浪漫城市之一，有好多值得到訪嘅旅遊景點，包括聖馬可大教堂、嘆息橋等等。

其實威尼斯瀉湖入面大大小小三十幾個島嶼，個個都各有特色，而今次小編就為大家推薦其中一個島嶼—彩色島布拉諾（Burano）。

Photo from shutterstock

Photo from shutterstock

布拉諾島距離威尼斯本島唔遠，搭水上巴士約40分鐘即可到達。面布拉諾之所以被稱為彩色島，係因為島上面所有嘅房屋都有住唔同嘅顏色，從遠處望過去就好似色彩繽紛嘅積木屋一樣，布拉諾島亦都因此獲BuzzFeed選為「一生人一定要去19個小鎮」嘅第一位。

同威尼斯一樣，布拉諾島上面主要嘅交通工具唔係車，而係船，所以每家每戶屋前都會有用嚟停栓住船隻嘅麥杆。

Photo from shutterstock

點解布拉諾島上面嘅居民要將自己間屋塗上唔同嘅顏色呢？其中一個傳說係當初島上嘅漁民喺濃霧中出海可以一眼見到自己嘅屋企，分辨出自己同家嘅距離，所以就將間屋塗上各種鮮豔顏色。

依家呢啲五顏六色嘅房屋就成為島上嘅最大特色喇！島民如果想重新塗上另一種嘅顏色需要向政府申請，然後喺政府提供嘅顏色入面選擇。

島上每一間屋嘅色彩都配搭得洽到好處，面且絕對唔會同隔離嗰間屋撞色，甚至連門窗嘅顏色都各有異同，有啲仲會畫上特別嘅圖案，喺島上隨便影張相都可以做明信片，連P圖都唔洗。

Photo from shutterstock

其中最特別嘅係Bepi's House，同其他房屋唔同嘅係佢嘅外牆畫咗好多色彩繽紛嘅幾何圖案，呢間屋嘅主人叫Bepi，非常鍾意睇電影，佢將底片剪做一格格，然後連埋一齊，投映喺牆上，令屋企變成戲院，一開始係自己欣賞，之後開放比島上居民睇戲，外牆嘅圖案就係為咗吸引客人而畫上，到依家已經成為咗島上嘅一個景點。

Photo from Burano 官網

Photo from Burano 官網

色彩鮮豔嘅房屋倒映喺島上嘅運河上面，無論影岸上定影運河都一樣咁靚。

Photo from shutterstock

除咗影相之外，仲可以到島上嘅聖馬丁諾大教堂（San Martino Vescovo's Church）參觀。聖馬丁諾大教堂最大嘅特色就係傾斜嘅鐘樓（Leaning Tower），係布拉諾島嘅地標，傾斜嘅鐘樓並唔係刻意設計，而係因為地層下陷嘅緣故，依家就成為咗地標，喺島上每一個角落都可以一眼望見呢座傾斜嘅鐘樓。

Photo from Burano 官網

Photo from shutterstock

布拉諾島最著名嘅除咗一間間彩色嘅房屋，仲有手工蕾絲（Lace），所以布拉諾亦有蕾絲島嘅美名。喺聖馬丁諾大教堂北面嘅廣場上有一座蕾絲博物館（Museo del Merletto di Burano），前身係蕾絲工藝學校，入面介紹咗蕾絲嘅歷史同製作技法等等，單張入場費係6.5歐羅，可以喺官網訂購。

布拉諾島上嘅手工蕾絲自16世紀就已經聞名於世，喺威尼斯售賣嘅蕾絲工藝品大多數都係出自布拉諾島，喺島上到處都係售賣手工蕾絲嘅店舖，各種蕾絲工藝品應有盡有，包括衫、鞋、手巾、扇等等，最適合買返去做手信！

Photo from shutterstock

Photo from shutterstock

成個布拉諾島唔大，可以預兩、三個鐘頭嘅時間遊覽，鍾意影相嘅朋友可以喺度影返夠本，仲可以買埋蕾絲工藝品返去添！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）