【一trip兩地】東京去大阪4大交通攻略 又平又快又方便

日本嘅東京同大阪都係香港人最鍾意去嘅地方。但可惜，香港打工仔嘅假期又唔算多。遊客們最糾結嘅問題就係：點樣喺短短唔夠一個禮拜入面玩得最多地方呢！依家就同你分析下喺東京搭咩交通工具去大阪會係最快、最方便！
利申：呢篇文以東京去大阪嘅單程為準！兩地來回，或者由大阪去東京嘅價錢同時間都會唔同！

Photo from 周亦瑋Instagram

Photo from 森美instagram

1.高速巴士
搭高速巴士係最平嘅選擇！最平嘅車費只需要4000円，即係港幣$280左右。每間巴士公司Offer 嘅價錢好唔一樣，唔係間間都咁平，而且價錢亦都會因為日子而浮動！不過有網友就覺得舒適度同價錢係成正比嘅，物超所值咁話！另外，有經驗嘅慳錢旅客就話，因為搭巴士需時8-10個鐘，所以如果夜晚先搭嘅話，就可以慳番一晚酒店錢！

除咗呢啲高速巴士之外，日本近年都推出咗新款豪華巴士，擴闊咗座位空間，令乘客坐得更舒服！

高速巴士有：
·Willer Express  價錢：4500-14400円(港幣$318-1020)

Photo from Willer Express

·京王電鐵 價錢：7400-8400円(港幣$525-595)

Photo from 京王電鐵

·京成電鐵
·西東京 價錢：5800-6800円(港幣$410-481)
·JR巴士  價錢：4000-11000円(港幣$283-800)

Photo from JR

·JR Dream Relier (豪華巴士）價錢：10000-18000円($708-1274)

Photo from JR Relier

大部分巴士只係需要一個月前預約就得，唯獨是Willer Express 要3個月前Book 定！想搭Willer Express嘅旅客們，睇啱時間就快啲book 啦～

搭巴士嘅好處同缺點～
好：夠平+有女性專用座位+班次多+上落車地點夠彈性！（JR巴士站數比較少）
壞：車程長（8-10個鐘）+日間班次少！

3.火車（電車／新幹線）
火車又係一個好方法！普通火車同新幹線提供咗唔少路線，大家可以自由選擇。普通火車嘅行車時間大概7個鐘至8個半鐘；而新幹線就快好多，只需要2個半鐘至3個鐘就到！去得多日本嘅「哈日族」提議：大家可以按需要買周遊劵，但要注意有啲係唔可以用嚟搭新幹線；新幹線嘅周遊劵亦都唔係適用喺全部列車，用之前一定要擘大眼，望清楚！

有買「青春18」周遊券嘅朋友請注意～！從東京搭非特急或新幹線嘅電車到大阪係絕對可以用「青春18」！途中亦可以落車玩完一輪再繼續旅程。所以雖然同樣係長途旅程，但搭火車／電車會相對自由呢～

火車就有3種：
·普通電車 價錢：8750円（約港幣$619）
·急行列車 價錢：13830-15990円(約港幣$979-1132)
·新幹線 價錢：13620円（13620円／約港幣$963）

普通電車所需嘅時間係三種火車入面最耐但最平，要8.5小時；新幹線係最快，又唔算貴，只係需要2.5小時至3個鐘！反而車費最貴嘅急行列車，花嘅時間都要7個鐘！小編就覺得好唔抵！

搭火車嘅好處同缺點～
好：新幹線車程短（大約2-3個鐘）+座位舒適+多班次+價格相對穩定
壞：固定咗上落站（東京／品川站->新大阪站）+只有日間班次

4.飛機
自從有咗廉航之後，基本上人人都買到機票！而且，日本個內陸機都好平，JAL、ANA等等嘅大型航空公司都有推出平價機票，飛行時間唔長，坐唔慣長途嘅旅客們有福啦～不過要小心，搭內航機多數都有行李重量限制，千奇唔好買得太多手信而搞到超重啊！仲有就係，東京同大阪分別都有兩個機場，小心唔好去錯！（有航空公司會將位於兵庫縣嘅神戶機埸都列入埋大阪嘅機場入面，所以要睇清楚！）

廉航機有：
·Peach Airline價錢：5300-12000円(港幣$375-850)
Handcarry(kg):手提行李 x1+隨身行李 x1=10kg
  *2018/10/28 起只能帶7kg

Photo from Peach Airline

·Jetstar
價錢：4300-11200円(港幣$304-793)
Handcarry(kg) :經濟艙7kg／商務艙：7kg x2

Photo from Jetstar

基本上，廉航嘅飛行時間都係大概1.5小時，但係Peach Airline比較上平少少。

搭飛機嘅好處同缺點～
好：飛行時間短+座位舒適+多班次～
壞：搭飛機以外嘅交通時間長+預留嘅時間多（辦理登機手續同安檢）+只有日間航班（最早朝早6點左右起飛，最遲夜晚9點半起飛）

4.的士
根據NAVITIME（交通 app） 嘅估計，由東京去大阪大概需要184550円，即係港幣$13000左右（已經包括咗高速公路嘅費用）；如果四個人一齊搭嘅話，每人都只係需要大概42762円，即係港幣$3000左右～成個路程需時6個幾鐘，比巴士同火車快咖！（唔塞車嘅話～）

日本有youtuber 喺舊年做過嗰實驗，就係搭的士由東京去姬路（兵庫縣）要用幾多錢！
經過8個鐘嘅車程，總共係要215370円，兌番港紙，即係差唔多$15200（已經扣除長途優惠）。

不過喺夜晚10點至凌晨5點出發嘅話，的士係會收取額外費用。搭的士嘅成本又會增加咗！所以，小編勸各位選擇咗搭的士嘅旅客，都係日頭起行划算啲！

搭的士嘅好處同缺點～
好：私人空間好夠！
壞：車程長+夜晚會更貴！

總括嚟講：大部分嘅方法只適用於日間--例如飛機／新幹線／急行+普通電車／的士（*日間係指最早6點，最遲夜晚9點半）；而夜晚最多班次嘅就係高速巴士！的士夜晚唔係冇，只不過夜晚的士司機會收取額外費用，唔夠划算！

Photo from NAVITIME

無論你去日本邊度，你想更準確知道唔同交通工具嘅行車時間，可以去https://www.navitime.co.jp/ check 下！你仲可以知道埋頭班同尾班車即時開出，避免搭唔到車／走車！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）