日本出入境物品限制須知+免稅調整安排！

日本係香港人嘅旅遊聖地，唔想因為帶錯嘢或者帶多咗嘢，入境嘅時候受到阻撓，延誤咗行程嘅話，就要留心睇下出入境日本有咩限制同違禁品啦！

入境

1.只可以帶100萬日圓以下嘅現金
日本海關規定，入境時攜帶現金、旅行支票、證券總值100萬日圓以上，或黃金（純度90%以上）達1公斤以上時，就必須辦理申報手續。

Photo from shutterstock

2.鋰電池要放手提行李！
根據日本2017年7月1日嘅新例，當乘客將電子用品寄艙時，一定要完全閂機，唔容許用睡眠模式或者飛行模式！一旦被發現，最高罰款50萬日元。而且，電子用品一定要妥善保護好，例如用衫包住等等，避免撞爛，意外漏出電解液，引發火警。而外置備用鋰電池（例如尿袋）就同以前一樣冇變，一定要放喺手提行李入面。

3.理髮器（直髮器+捲髮器）：

Photo from shutterstock

根據日本民航局嘅規定，如果理髮器入面嘅鋰電池可以拎出嘅話，冇咗電池嘅理髮器就可以擺入隨身行李或者寄艙。拎出嚟嘅鋰電池不可以超過160Wh，同埋要放喺隨身行李入面。唔係嘅話，所有以鋰電池發電嘅理髮器都唔可以以任何方式上機。

另外，坊間有啲理髮器係以氣體操作，有機會釋放氫氣，所以日本就要求乘客們要確保理髮器發熱嘅部分完全遮住晒先可以帶上機。（包括寄艙或者隨身行李）

不過，以電源插座同埋乾電池發電嘅理髮器就唔受影響，日本對呢兩類嘅理髮器冇特別管制，貪靚嘅女士們可以放心啦！

講完入境，就要講下有咩唔帶得出境啦～香港人都對日本嘅食物都情有獨鍾，但唔係樣樣嘢都出得境！

出境

1.生嘅食物
例如蛋。未煮熟嘅蛋係唔可以帶入香港境內！就算你幾鍾意日本嘅溏心蛋飯糰都好，留番喺日本食啦～無論邊一個國家，生肉都係被拒絕出境嘅，唔好帶番香港啦！

Photo from shutterstock

2.米唔可以超過15公斤
另外，帶米出境都有限制。買米記得唔好買超過15公斤番香港，超過咗，就要申請進口許可證。

3.產量少嘅食物
仲有，日本基本上對生果、蔬菜嘅出口冇管制，但喺日本著重保育，產量少嘅食物（例如沖繩紅薯），就禁止出境啦！

4.杯面手信
大家唔好緊張住～唔係唔可以買杯面做手信，而係提醒番大家，日本部分杯面入面係附有液體湯包，幾包加埋可能會超過100毫升，所以記得放埋喺寄艙行李入面啦～

Photo from Nissin 官網

5.啫喱、布甸
啫喱、布甸等等凝固咗就係固體，但難保受熱會溶化，變番液體。根據液體管制條例，都係乖乖哋寄艙啦～

6.利器
有啲香港人會想將日本嘅名物帶返香港，例如武士刀、手裡劍等等，呢啲武器係比帶出境，但一定唔可以跟隨身行李上機！

Photo from shutterstock

除此之外，精明嘅香港人去日本買嘢一定會留意免稅！

Photo from shutterstock

依家唔單止消耗品同一般用品有得免稅，2017年10月起連酒都可以免稅啦！簡直係愛酒人士嘅福音！

2018年7月1日起，無論係消耗品或者係一般用品，只要加埋有5000日圓以上，即可免稅！特別留意嘅係，要免稅嘅物品一定要一併擺入免稅專用袋。未出境之前，入面嘅物品係唔用得住！拆開咗個袋，就有機會免唔到稅！所以大家要留心啦！！

另外，2020年4月開始，日本就會實施退稅手續電子化，到時商鋪可以將旅客購買免稅品嘅記錄，直接傳送去海關嘅電子系統，旅客過關嘅時候只要出示護照就搞掂。各位遊日嘅旅客終於唔洗再帶住本咁厚嘅護照啦！

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）