余德丞甦醒後首度開腔向大家報平安 佢仲話：原來心臟曾經停咗一段幾長嘅時間！

余德丞8月8號晚，同朋友踢波期間唔舒服，已經即時落場休息。攤咗喺地下無耐，手腳突然僵硬抽搐，好彩隊友即時發現，送佢入醫院！佢一度要瞓ICU，仲有報導指佢情況嚴重，搞到余德丞嘅fans 驚咗一餐！

Photo from 余德丞instagram

今日，余德丞接受Big Big Channel嘅電話訪問就話：「我覺得自己好好彩，非常感恩、開心，今次可以大步欄過，可以醒得番，再同你哋（大家）講野。所以真係衷心多謝全香港每一位嘅關心、問候、祝福同集氣，令我可以醒番。」

Photo from 余德丞instagram

原來佢個病情曾經係咁嚴重：

「其實醒番先知道件事都好嚴重，喺昏迷嘅時候，（我）心臟曾經聽過一段幾長嘅時間，所以起得番身，再同大家傾計，真係好好彩！」

「呢幾日慢慢康復，精神咗好多，講嘢都清楚咗，咁當然醫生都建議我要留院多一段時間，Check清楚身體係咪真係OK，先至可以出院。最後，我要多謝瑪麗醫院上上下下嘅醫護人員佢哋嘅悉心照顧，同埋喺關鍵時候幫我做心肺復甦嘅足球隊隊友。屋企人每日嚟支持我、整嘢畀我食，仲有TVB上上下下好同事，同埋咁多位傳媒朋友，冇咗你哋邊個都唔得，所以，我希望可以快啲出院，同大家見面，有咩新消息我再通知你哋，記住身體健康最緊要。」

Photo from 余德丞instagram

咁多位余德丞嘅fans，聽到佢親自回應，係咪放心好多呢？

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）