延禧宮成故宮熱門景點 魏瓔珞住嘅延禧宮入面有座爛尾樓？

《延禧攻略》大熱，全城熱播，香港同內地兩地觀眾追劇追到如火如荼，目前全劇已播到接近尾聲，而延禧宮都成為故宮入面嘅熱門景點，遊客必到之地。

不過喺《延禧攻略》播出之前，延禧宮並未為人所知，一嚟因為延禧宮地理位置偏遠，位於東六宮區嘅東南角。二嚟係因為延禧宮中央有一座爛尾樓，頗為有礙觀瞻。

Photo from 故宮博物院官網

Photo from 故宮博物院官網

《延禧攻略》入面魏瓔珞一路過關斬將，由富察皇后身邊嘅宮女到后宮中嘅令妃，瓔珞所住嘅延禧宮似乎好好風水，不過睇返歷史就知道令妃娘娘得勢並唔係因為延禧宮風水好，實際上延禧宮曾經經歷過多次火災。

Photo from 《延禧攻略》官方微博

Photo from 《延禧攻略》官方微博

Photo from 《延禧攻略》官方微博

延禧宮係明朝時興建，一向係后宮妃嬪嘅居所，自明朝以嚟多次失火，乾隆皇帝個孫道光帝在位嗰時發生過兩次火災，咸豐帝（即乾隆皇帝同令妃娘娘個曾孫）在位時又再次失火，咁樣睇嚟，延禧宮命運坎坷。

因為延禧宮經常失火嘅關係，到清朝最後一個皇帝宣統帝時，就決定喺延禧宮入面起一座三層西洋式建築水殿「靈沼軒」，打算以玻璃為牆，喺牆夾層中放水養魚，並可以透過玻璃地板見到底下游魚喺池入邊游水，俗稱「水晶宮」，想用水震壓住不停咁起嘅火。

Photo from shutterstock

Photo from 故宮博物院官網

Photo from 故宮博物院官網

但係呢座水晶宮喺落成之前，清朝就滅亡，呢座水晶宮都未起得成，只係得啲鐵枝喺度，到1917年，延禧宮甚至仲被飛機投炸彈炸毀，真係多災多難！

Photo from 故宮博物院官網

Photo from 故宮博物院官網

去延禧宮參觀，一入門口就會見到呢座水晶宮，由於水晶宮係西洋建築嘅關係，延禧宮展出嘅多係西洋文物，成為故宮博物院嘅外國文物館。

Photo from 故宮博物院官網

《延禧攻略》熱播後，延禧宮成為咗遊客必去嘅故宮熱門景點，《延禧攻略》官方微博都po出一張約會建議路線圖添！大家依呢條約會路線參觀故宮，就好似化身瓔珞咁！

Photo from 《延禧攻略》官方微博

《延禧攻略》入面魏瓔珞誕下嘉慶帝，最後成為后宮大贏家，而現實中延禧宮卻火災不斷，雖然依家嘅延禧宮並唔係好似劇入面咁，但都不失為一個參觀嘅好地方。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）