櫻桃子因病逝世 真實童年並非像漫畫般完美 同爺爺關係原來唔係咁

《櫻桃小丸子》嘅原作者櫻桃子（本名：三浦美紀）日前因不敵乳癌病魔，與世長辭，終年53歲。櫻桃子嘅家人日前已經低調幫佢舉行咗喪禮，琴日（27日）就正式向大眾宣佈消息，網友紛紛表示悲痛。

Photo from Pinterest

櫻桃子嘅作品《櫻桃小丸子》帶俾人一種好歡樂嘅感覺，亦有唔少人都會覺得「小丸子」嘅美好童年，就係作者櫻桃子嘅寫照，但實情原來唔係咁的，櫻桃子喺自己嘅雜誌專欄提到過漫畫係以自己為藍本，但並唔係百分百呈現自己嘅人生。

小丸子名字嘅由來

Photo from Pinterest

筆名櫻桃子，真名三浦美紀，咁點解漫畫入面會叫做小丸子呢？原來「小丸子」係櫻桃子細個嘅乳名。

Photo from Pinterest

「爺爺」呢個角色係對心中「理想的爺爺」嘅投射

Photo from Pinterest

而相信最令人詫異嘅就係小丸子同爺爺嘅關係啦，喺漫畫入面，小丸子嘅爺爺對自己好照顧，關係好到羨煞旁人。但原來現實生活入面，櫻桃子同爺爺嘅關係係極其地差。

Photo from Pinterest

曾經，櫻桃子喺散文入面度提及爺爺係家族入面最唔受歡迎嘅一個人，仲曾經被爺爺偷睇自己沖涼，而嫲嫲同爺爺性格亦都非常冷漠，所以同漫畫入面嘅形象係完全兩極化。

Photo from Pinterest

櫻桃子喺專欄提及道：「漫畫中爺爺呢個角色，係彌補心中嘅遺憾。」相信漫畫入面嘅爺爺，就係櫻桃子心中幻想出黎嘅爺爺。

Photo from Pinterest

櫻桃子仲曾經因為被一封讀者來信，而令自己有啲迷失。信中內容大概提及到，該讀者一直好喜歡櫻桃子嘅作品，認為櫻桃子應該為自己嘅幸福而努力，質問對方點解無過住幸福嘅生活，而且仲講自己爺爺嘅壞話，認為後輩唔應該講長輩嘅不是。仲講話聽到都覺得討厭，依家已經唔鍾意櫻桃子，要求佢向大家道歉，收番曾經講過對爺爺唔好嘅說話，不然就唔再鍾意佢。

櫻桃子：「真正的友情不會因為時間和距離而變淡，反而會因為思念而加深。」

Photo from Pinterest

事後櫻桃子覺得好不知所措，已經唔知道自己點解要做漫畫家，覺得明明創作內容係漫畫，應該唔需要同現實人生一樣先啱。櫻桃子想搵朋友傾訴內心嘅納悶，但係就唔知應該搵邊個。

Photo from Pinterest

漫畫入面嘅好閨蜜小玉，原來已經一早嫁咗去美國，好耐都無聯絡了。但係，過咗一個禮拜突然收到小玉嘅來信，除咗對櫻桃子滿滿嘅關懷，仲隨信附上一部小玉爸爸嘅相機。

Photo from Pinterest

原來係因為小玉爸爸早前離世，喺信中提到自己爸爸雖然唔係好似小丸子漫畫入面咁瘋狂地為自己影相，但係對於自己被寫喺漫畫入邊係相當開心。所以小玉依家決定送咗部相機俾櫻桃子留念。

Photo from 東森幼幼

相信櫻桃子嘅漫畫入面嘅角色設定同故事，都係佢夢想中希望擁有或者發生嘅嘢。讓我們永遠懷念帶給我們無限歡樂的櫻桃子。R.I.P

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）