《延禧攻略》4大未解之謎 爾晴個仔嘅父親係邊個？番外篇有解答？

喺中港兩地大熱嘅《延禧攻略》日前已播出大結局，劇中奸角都得到報應，可謂大快人心。之前盛傳《延禧攻略》本來有94集，但播出卻刪減到70集，唔知係咪同無咗嗰24集有關，仲有4大疑團仲未破解！

1. 爾晴個仔嘅父親究竟係邊個？

Photo from 《延禧攻略》

Photo from 于正 weibo

爾晴可以話劇中最乞人憎角色，唔少劇迷都希望佢快啲「領飯盒」，佢唔單止要脅傅恆娶自己，仲同富察皇后講自己爬上龍床，激死皇后，令觀眾個個都恨佢恨得牙癢癢。

Photo from 于正 weibo

爾晴雖然嫁咗比傅恆，但兩人從未圓房，爾晴卻生下一個兒子，比綠帽傅恆戴，咁究竟個仔嘅爸爸係邊個？唔通真係皇上個仔？

Photo from 于正 weibo

有觀眾認為係同爾晴有染嘅傅恆弟弟傅謙，佢懷孕之後恐怕會比傅恆揭穿，所以謊稱係皇上個仔，咁一嚟傅恆唔夠膽對佢出手，二嚟又可以刺激皇后，果然陰毒。

2. 高貴妃同瓔珞家姐魏瓔寧有咩關係？

Photo from 于正 weibo

瓔珞一開始入宮都係為佢家姐，而劇情都有提到害死魏瓔寧嘅人係裕太妃，不過《延禧攻略》嘅製片人于正曾經喺微博po出一張劇照，相中高貴妃著住戲服，而魏瓔寧就喊住靠喺高貴妃膊頭，令一眾劇迷都好疑惑兩人有咩關係。

Photo from 于正 weibo

Photo from 于正 weibo

不過于正就表示呢個疑團會喺《延禧攻略》番外篇解開。

3. 魏瓔寧同皇上嘅關係？

Photo from 鄧莎 weibo

原來魏瓔寧同皇上都有關？飾演魏瓔寧嘅鄧莎喺微博po出一張劇照，入面魏瓔寧同皇上企埋一齊，似乎兩人都係相識嘅？

但劇情中並無交待佢哋有交集，唔知喺番外篇會唔會解答埋呢個疑團呢？

4. 袁春望嘅真正身分係？

Photo from 王茂蕾 weibo

袁春望係後期出現嘅大奸角，佢投靠繼后，處處同瓔珞為敵，而劇情就暗示佢可能係雍正個仔，而袁春望自己都係咁認為嘅，所以佢對皇族心存怨恨。太后卻一口咬定佢唔係先帝個仔，但係就阻止皇上處死壞事做盡嘅袁春望，又唔肯透露留佢一命嘅原因，唔通袁春望真係皇族後裔？

Photo from 于正 weibo

其中一種講法係袁春望的確係先皇個仔，太后咁做係為咗保存皇室顏面。仲有一種講法係其實袁春望係太后被匪徒姦污後所生嘅私生子，唔殺佢係因為袁春望係自己親生仔。

《延禧攻略》嘅完結令唔少追劇觀眾都覺得空虛，同時都留底咗一啲未解疑團，好在仲有番外篇，唔知可唔可以解開晒上面提及嘅未解之謎呢？

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）