《國定殺戮日》前傳回帶恐怖開端！揭開殺人節誕生之謎 反映可怕人性+政治

反烏托邦驚慄電影《國定殺戮日》系列已經拍過三部曲，故事設定喺虛構嘅美國社會，為減低「國家犯罪率」而舉行一年一度嘅「合法殺人節」，12小時內市民可以為所欲為，殺人放火都毋負刑責！一夜之間，血腥暴力瘋狂爆發！前三集都主力以唔同背景嘅殺戮戰，去呈現呢場終極人性大挑戰。

而最新上映嘅《國定殺戮日：屠亡前傳》（The First Purge）就回到問題開端，講述呢個咁瘋狂嘅「節日」係點出現。 有別於以往三部曲，前傳將殺戮戰搬到政治層面，反映人性善惡之餘，同時探討現實社會問題。

Photo from Universal Pictures

今次前傳講述美國政黨為「解決國家財赤、人口過多問題」，就挑選全美國最多貧窮有色人種、幫派混雜嘅史泰登島水牛城，推行一場美其名為「社會實驗」嘅「合法殺戮日」，以獎金利誘居民參與殺人，藉此引發窮人自相殘殺，剷除低下階層去維穩國家。

水牛城毒販幫老大迪米特（Dmitri）知道將家園被定為實驗地點後，開始懷疑政府目的。為了拯救小鎮同保護前女友妮雅（Nya）及其家人，就喺「殺戮日」走上街頭，同街上「敵人」、來歷不明嘅「秘密軍人」展開生死戰！

廝殺期間，迪米特更發現所謂「合法殺戮日」只係一個局，背後暗藏政府驚天大陰謀！

Photo from Universal Pictures

另一邊廂，反對「殺戮日」嘅激進份子妮雅不知不覺成為殺人狂嘅獵物，弟弟艾西亞卻為了錢而加入「殺戮日實驗」⋯⋯

Photo from Universal Pictures

今次電影喺製造恐怖氣氛、張力依然取勝，令觀眾愈睇愈心慌！「戰場」由街頭、教堂到圍攻平民公寓，無情軍隊逐層射殺無辜居民，即使緊守家中都唔再安全！

Photo from Universal Pictures

除咗得個驚字，電影喺細微處都帶有暗喻，探討人性真實一面。例如「參與者」借殺戮日滿足私慾作惡，但人性絕非非黑即白，有人即使滿手鮮血仍因羞恥之心，而戴上面具掩飾身份。再者，窮人表面上為「獎金」殺人，實質係為發洩社會不滿、尋刺激定釋放自我，真係不得而知。

Photo from Universal Pictures

另有評論指電影暗喻美國現今政治同種族問題，如片中白人政府專挑黑人社區進行殺戮實驗，而當黑人處生死邊緣之際，白人則安坐總部「監視」戰況，玩弄黑人性命於股掌中。

Photo from Universal Pictures

有興趣入場嘅朋友，除咗準備流汗尖叫之外，都不妨發掘吓劇本嘅深層意味啦！

《國定殺戮日：屠亡前傳》The First Purge

上映日期： 8月30日

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）