日本可口可樂9月17號出可樂咖啡！係可樂？定咖啡？一杯只有50 kcal～

日本可口可樂公佈會係9月17號起開始發售新產品「可口可樂 Plus咖啡」，姐係可口可樂咖啡！咁姐係可樂定咖啡啊，媽啊好亂啊～

根據官方講：可口可樂咖啡係將可樂嘅炭酸同刺激感加入咖啡嘅香味混合而成嘅炭酸飲品黎啊～
Photo from コカ･コーラ (Coca-Cola)

一飲落去會感受到咖啡豆嘅風味，係可樂嘅炭酸感之後會有微微咖啡嘅苦澀味。感覺好似好複雜，不過連平時唔飲可樂嘅小編見到都想試下啊！

日本可口可樂公司推出呢個可樂咖啡原來都經過詳細調查，驚喜地發現到日本人最多係係辦工時間飲可樂！！當然咖啡亦係得出同樣結果啦～

所以早係2017年9月，就首次係部分地區嘅自動販賣機推出咖啡可樂呢個組合～大受歡迎之後就決定係全國推出「可口可樂 Plus咖啡」，比大家係辦工時間暢飲咖啡可樂！
Photo from コカ･コーラ (Coca-Cola)
Photo from コカ･コーラ (Coca-Cola)

可口可樂本身卡路里係45kcal/100ml；而可樂咖啡不足一半，只有20kcal/100ml，一杯只有50kcal。算係幾低卡喎！

官方售價定係128円/罐。留意番，係9月17號就會係日本全國開始公開發售喇～
Photo from コカ･コーラ (Coca-Cola)

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）