遠睇好似薄荷味雪糕！澳洲絕景白天堂沙灘 清澈海水＋純白沙灘

澳洲嘅陽光與海灘聞名於世，但其實澳洲仲有好多壯麗景觀，今日小編為大家介紹澳洲昆士蘭嘅白天堂沙灘。

白天堂沙灘（Whitehaven Beach）位於聖靈群島最大嘅聖靈島上，係澳洲國家公園保護區，《加勒比海盜：惡靈啟航》都喺度取過景㗎！

Photo from 澳洲旅遊局官網

Photo from 昆士蘭州旅遊及活動推廣局facebook

Photo from shutterstock

「白天堂沙灘」，聽名就知呢度有幾靚啦，唔單止海水非常清澈，呈薄荷綠色，沙粒更加係世界上純淨嘅沙種之一嘅白色硅沙，純白而幼細，唔怪得之有「澳洲最美沙灘」同「全世界最環保最乾淨沙灘」嘅美譽。

Photo from shutterstock

根據澳洲旅遊局所講，白天堂嘅沙係地球上最白嘅沙，當中有98%成分為二氧化矽，唔可以保持熱量，而且沙粒非常幼細，呈粉末狀，所以遊客可以勁舒服咁喺軟綿綿嘅沙灘上面行，就算喺一日最熱嘅時段都唔會畀腳板底嘅沙燙到喺沙灘上面跳舞，因為白天堂嘅沙係保持唔到熱量，一啲都唔熱㗎！

Photo from shutterstock

白天堂沙灘總長超過7公里，分為南北兩部分，南邊適合玩浮潛、游泳等，而北邊就可以去希爾灣觀景台，觀賞白天堂沙灘嘅全貌。

小編私心覺得最靚嘅就係希爾灣（Hill Inlet）入口，嗰度海水同沙灘邊界唔分明，水沙相混，離遠睇好似混合咗薄荷味嘅雲呢拿雪糕咁啊！唔識游水都唔怕，喺希爾灣嘅淺水區上面漫步，望住碧綠嘅海水，簡直係一大享受！

Photo from shutterstock

Photo from shutterstock

Photo from 昆士蘭州旅遊及活動推廣局官網

想去白天堂有兩種方法：搭飛機同搭船，當地亦都提供好多一日遊行程，可以揀合適嘅行程參加。

搭飛機可以選擇直升機或者海上飛機，搭飛機可以帶你從上空飽覽整個白天堂沙灘同附近嘅聖靈群島，仲可以完美咁睇晒希爾灣嘅薄荷綠雪糕景色添！

Photo from shutterstock

Photo from 澳洲旅遊局官網

搭船就可以近距離欣賞清澈嘅海水，而船都分幾種：遊船、雙體船、快艇等等。仲可以選擇租船過夜，想喺白天堂留幾耐都得，仲可以盡情遊覽聖靈群島嘅74個島嶼添啊！

Photo from 澳洲旅遊局官網

白天堂並無開發碼頭、酒店等，係全天然嘅海灘，由於係國家公園保護區，白天堂嘅沙係唔可以帶走㗎！否則會被澳洲政府罰款2萬澳元。

白天堂咁靚，人生一定要去一次，睇下呢個「澳洲最美沙灘」啊！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）