鐮倉一日遊懶人包！一文睇曬交通+5大特色景點多個電影/動畫朝聖地！

日本旅遊

By Jackie on 03 Oct 2018

Digital Editor

全職寫字，副業畫字，打算一輩子揸筆揾食，畫筆鉛筆雙兼得。「唔化妝襯衫唔出門症」末期患者，童真外表掩飾內心麻甩思想，夢想是在大學畢業後退休，顯然失敗。

如果大家有睇是枝裕和嘅《海街日記》，又或是喺今年年頭於香港上映嘅《鐮倉物語》，相信對鐮倉呢個地方都唔陌生！鐮倉雖然無《鐮倉物語》入面嘅妖怪、幽靈睇，但都係一個值得去嘅東京近郊地嚟㗎！

Photo from Shutterstock

鐮倉距離東京市區約一小時車程，遠離都市環境，而且當中嘅懷舊街道、神社、住屋都極具日本古老風味，可以話係東京渡假必去地！若然大家都懶得Plan行程，不妨跟住以下景點，喺鐮倉玩一日再即天返東京啦！

Photo from Shutterstock

交通 1：從池袋、新宿、澀谷出發
如果由池袋、新宿、澀谷出發的話，可以搭「JR湘南新宿線」逗子方向直達鐮倉駅，途中唔需要轉車。但如果搭錯國府津、小田原方向，就需要喺大船駅轉乘「JR橫須賀線」到鐮倉啦！車程時間約一小時左右，不論池袋、新宿定澀谷，票價同樣都係920円(約港幣63元)。

Photo from JP東日本官網

如果由新宿出發，其實仲有另一個方法遊鐮倉！大家可以購買「江之島-鐮倉周遊券」，從小田急線嘅新宿駅出發，到藤澤駅轉江之電電車，便可到達鐮倉！價錢亦都相對較平，從新宿出發為1,470円(約港幣101元)，從町田出發為1,020円(約港幣70元)，從藤澤出發為610円(約港幣42元)，當中包新宿往返藤澤來回車票，以及江之電電車一日自由上落車，所以同樣推薦大家買周遊券！

Photo from 小田急電鐵官網

有興趣買「江之島-鐮倉周遊券」，大家只要喺「小田急旅遊服務中心」或小田急線各車站嘅「自動售票機」買就得㗎啦，而且仲有唔同門票、餐飲折扣優惠！

Photo from 小田急電鐵官網

交通 2：從東京、品川出發
如果由東京、品川出發，就可以坐「JR橫須賀線」直達！車程時間約一小時之內，東京駅出發票價為920円(約港幣63元)，而品川駅出發票價為720円(約港幣50元)。

Photo from JP東日本官網

交通 3：從成田機場、羽田機場出發
從成田機場出發的話可以坐「N'EX 成田特快」直出大船駅，然後從大船駅轉乘「JR湘南新宿線」約10分鐘車程便可到達鐮倉駅，車程共約1小時多。如果大家有買「N'EX 優惠來回車票」，仲可以喺大船駅免費轉乘「JR橫須賀線」到鐮倉駅添！

Photo from JP東日本官網

而羽田機場到鐮倉的話，由於無直達交通，會比較麻煩，建議大家可能先去市區景點玩一日，另一日再從住宿到鐮倉玩。但如果有需要從羽田機場到鐮倉，可以先搭「京急電鐵」到橫濱車駅，再轉乘「JR湘南新宿線」或「JR橫須賀線」到鐮倉，車程同樣都係約1小時。

Photo from 羽田機場交通指南官網

計畫往返時間
由於鐮倉喺近郊地區，車程需要1小時或以上，所以大家最好前一晚早啲瞓，當日大約要早上8點幾由住宿出發㗎啦！去到鐮倉大約9點幾10點，最後可以預大約6點約7點多離開鐮倉，返到市區都已經8點幾9點，唔會因預錯時間而太夜出市區，加上玩咗接近10個鐘都絕對超滿足！

Photo from Shutterstock

到鐮倉之後，究竟有咩必去景點呢？其實每個人去旅行想睇嘅嘢都唔同，唔可能有個完美行程滿足曬所有人，所以小編為大家介紹以下值得去嘅鐮倉景點，大家可以隨個人喜好揀自己中意嘅地方，好好喺鐮倉享受悠閒時光啦！

Photo from Shutterstock

景點 1：購物勝地 — 小町通
乘坐江之電前往鐮倉站，就可以去小町通購物啦！只要大家從鐮倉站東出口，步行約1分鐘就到小町通商店街㗎啦，當中有好多特色雜貨，而呢度亦係鎌倉最熱鬧嘅街道，終點為鶴岡八幡宮，大家可以先去小町通商店街購物，再到鶴岡八幡宮參觀，然後順若宮大路返鐮倉車站。

Photo from Shutterstock

除咗雜貨，小町通內仲有好多大大小小嘅特色商店同餐廳，例如精品店Melting Pot、專賣帽子嘅鐮倉帽子店、必吃蛋糕店Iwata Coffee、雪糕店鐮倉茶茶等，真係行到唔捨得走啊！

Photo from Shutterstock

如果你係宮崎駿迷，就一定要去小町通內嘅橡子共和國啦！入面有多套宮崎駿動畫嘅吉卜力專門店，如《魔女宅急便》、《龍貓》、《千與千尋》、《哈爾移動城堡》等，宮崎駿迷準備燒錢啦！

Photo from FB@どんぐり共和国

小町通
地址：神奈川縣鎌倉市小町2-8

景點 2：鐮倉最著名神社 — 鶴岡八幡宮
到鐮倉一遊，當然要去一啲著名景點啦，而鶴岡八幡宮簡直係鐮倉必訪神社啊！從鐮倉駅徒步約10分鐘便可到達神社，鶴岡八幡宮於1063年由源賴義建造，於1180年由鎌倉幕府嘅創始人，兼第一位將軍源賴朝擴建，並搬到現址。

Photo from Shutterstock

鶴岡八幡宮更有守護關東地區嘅神靈之稱，被認為係成個國家嘅守護神，亦成為武士們嘅起源地，所以嚟鶴岡八幡宮參觀，絕對可以感受到濃厚嘅日本歷史風情！

Photo from Shutterstock

地址：神奈川縣鎌倉市雪ノ下2丁目1－31
門票：免費
官網：https://www.hachimangu.or.jp/

景點 3：搭「江之電」遊鐮倉成為電影中的主角！
「江之電」可謂鐮倉必搭！大家可以買「江之電1日乘車券」，大家可於一日內自由來往藤澤與鎌倉區，一共15個站，途經多個著名景點，如長谷站嘅鐮倉大佛、江之島站嘅片瀨江之島、鐮倉高校前站等。成人價錢為600円(約港幣41元)，兒童則有半價，車票可以喺江之電各站售票機購買。