10間少人知香港尋寶小店！世界各地精品/家品/懷舊小物中古年代產物都有！

By Jackie on 10 Oct 2018

Digital Editor

全職寫字，副業畫字，打算一輩子揸筆揾食，畫筆鉛筆雙兼得。「唔化妝襯衫唔出門症」末期患者，童真外表掩飾內心麻甩思想，夢想是在大學畢業後退休，顯然失敗。

香港身為一個國際化嘅城市，唔同大大小小嘅商場入面都係世界各地品牌連鎖店。香港人行得多可能都開始生厭，如果大家鍾意尋寶，又或者鍾意大品牌以外，又比較特別嘅店舖，其實唔一定要去其他國家、城市先有㗎！小編為大家精選咗10間香港有特色嘅尋寶小店，大家有興趣不妨去行下睇下，包大家有驚喜啊！

Photo from IG@sellsondonttouchhead

小編之所以會稱以下店舖為「尋寶小店」，因為入面賣嘅嘢真係估你唔到咁特別啊！當中有好多產品都係各店主四處搜羅返嚟嘅小物、中古年代嘅產物等等，件件產品都又靚又有歷史，出面幾乎唔會搵到，所以大家入到去真係要花時間慢慢尋寶先得啦！

Photo from IG@abeautifulstore

1. 貘記
貘記係一間位於港島區嘅雜貨小店，店主有時仲會舉辦唔同展覽及工作坊，大家除咗可以上去見到好多唔同又靚又有特色嘅復古小物外，只要捐助小店，店主就會請大家食甜品、咖啡！

Photo from IG@Hellomakee

入面嘅小物都係店主多年去旅行、公幹時儲落嚟嘅，所以有好多唔同世界嘅復古小物，包括餐具、精品、文具、布藝品、玻璃製品等，大部分都獨一無二，設計又精緻又吸引！

貘記
IG：Hellomakee
FB：貘記 Makee
地址：上環永樂街65號4樓

Photo from IG@Hellomakee

2. 常常集品
常常集品以出售古道具為主，一入店舖已經予人一種古舊又舒服嘅感覺，入面所出售嘅都係一啲特色舊物，每件貨品嘅數量唔多，如果鍾情日本舊古物嘅朋友更加要去睇下啦！

Photo from IG@changchang_goodstore

店內有售日本昭和晚期木箱、於2008年結業嘅中環著名老字號「永和號雜貨店」舊單據木箱、香港舊巴士車票、日本漢字鉛字粒、於2006年結業嘅香港唯一上海式澡堂「浴德池」所用號碼牌等，其實當中小編最中意嘅係，店主會喺IG/FB為大家逐一介紹每件古物嘅歷史故事同由來，真係好有心思之餘仲令人大開眼界！

Photo from IG@changchang_goodstore

除咗舊物外，仲會出售部分特色小物，如福岡縣一位陶藝家所製嘅得意麵包碟、香港陶瓷家製作嘅陶瓷餐具等等，簡直係新舊物都包羅萬有啊！

常常集品
IG：changchang_goodstore
FB：常常集品 ChangChang Goodstore
地址：油麻地上海街273號1樓

Photo from IG@changchang_goodstore

3. 賣仔勿摸頭

Photo from IG@sellsondonttouchhead

呢間「賣仔勿摸頭」，聽個名除咗覺得特別之餘，都好表達到店主真係好中意古物，當佢哋仔咁「一摸眼淚流」啊！而入面所賣嘅二手舊物真係睇到小編哇哇聲好震撼，店舖主要係香港及各地舊物收藏買賣為主，當然入面件件舊物價值不菲，不過唔一定有嘢買先到舖嘅，大家都可預約入去參觀㗎！

Photo from IG@sellsondonttouchhead

店主本身為係一個收藏家，所以入面嘅舊物真係好誇張，有60年代上海師傅製嘅女賓理髮椅、香港昔日人力車、60年代幼稚園學生櫈仔、舊時香港手寫牌等等，連59年前嘅綿羊仔都有⋯⋯淨係睇相都已經好震撼，好似時光倒流到舊時咁啊！

賣仔勿摸頭
IG：sellsondonttouchhead
FB：賣仔勿摸頭
地址：葵涌永建路二號永健工業大廈21樓I室

Photo from IG@sellsondonttouchhead

4. Sunfafa / MoonChouChou
大家可能會好奇點解一間舖會有兩個名呢？其實因為呢間小店係由一對情侶Dick同Christy設立嘅，入面主要出售二手古著服飾，另外仲有部分由日本、歐洲等地搜購嘅懷舊小物。

Photo from IG@sunfafavintage

想睇女裝古著同小物嘅可留意Sunfafa，而男裝古著就可留意MoonChouChou啦！

Photo from IG@sunfafavintage

Photo from IG@moon.chou.chou

情侶檔店主以家庭式經營小店，而其實小店都係佢哋所住嘅地方，所以入到去總比人一種「70年代家的感覺」，環境非常舒服，入面嘅一磚一物都好靚好重懷舊感，店主仲會好好人咁為大家斟茶遞水，大家都可以坐底同店主傾下計，因為店內嘅傢俬電器都好有故事，並唔似一般商店咁講嘢只得「Hard Sell」，上次小編去到真係傾到唔願走啊，不過記得要除鞋先好入屋啊！

Sunfafa / MoonChouChou
IG：sunfafavintage / moon.chou.chou
FB：Sunfafa / moonchouchou
地址：深水埗基隆街108號唐7樓(8/F)

Photo from IG@sunfafavintage

5. A Beautiful Store
如果中意一啲較特別，但並非懷舊、二手古物嘅話，A Beautiful Store都係一個尋寶之選嚟㗎！A Beautiful Store主要出售特別而且以美學為主嘅器具、服飾以及生活用品，入面不論店內裝修以至商品都非常簡潔樸素，商品都偏向女性為主，啱曬中意文青風嘅朋友啊！