萬聖節限定！大阪梅田Hep Five「怪談車」千與千尋聲音出演 仲有點心/萬聖節化妝服務

萬聖節仲有半個月就到喇！大阪梅田嘅Hep Five就舉辦咗特別活動迎接萬聖節。

大阪不嬲都係香港人最常去嘅熱門旅遊地方，而梅田嘅Hep Five相信大家都唔會陌生，因為大阪周遊卡係可以免費搭Hep Five嘅摩天輪㗎！

為咗迎接即將到來嘅萬聖節，Hep Five摩天輪改裝成萬聖節「怪談車」，令大家置身喺無法逃離嘅密閉空間，啱晒鍾意恐怖刺激嘅朋友！

Photo from HEP FIVE

Photo from Modelpress

Photo from Modelpress

配合返萬聖節嘅恐怖氣氛，怪談車車廂嘅外圍同内裡都佈置得非常恐怖，而怪談車一共有兩種主題：「「ひとりぼっち（孤身一人）」，以及「呪われた神無月（被詛咒嘅神無月）」，乘客坐喺怪談車入面就要聽晒其中一個恐怖故事，加上怪談車嘅佈置，少啲心血都好易嚇親啊！

Photo from ファッションプレス

《孤身一人》係講述1970年當時小學五年級嘅主角小女孩，同父母、哥哥一家4口從福岡去到大阪。本來係一件開心幸福嘅事，但其實呢啲都只不過係小女孩自己幻想出嚟。事實上小女孩嘅爸爸因為工作失敗而人間蒸發、媽媽自殺、哥哥就因為事故身亡。

成為孤兒嘅小女孩淨返自己一個，被親戚收養到大阪，但係小女孩非常抗拒，逃走後更加下落不明，陷入喺福岡同父母哥哥一齊生活嘅幸福回憶之中⋯⋯

Photo from ファッションプレス

《被詛咒的神無月》就講述過去嘅10月，日本八百萬神明都集中晒喺出雲大社，其他各地無晒神明，所以10月又稱為「神無月」。一到神無月，喺異界交接處嘅惡靈就會趁神明唔喺度而現世！

離地面108公尺嘅Hep Five摩天輪就係異界交接處唯一嘅入口。到神無月之時，摩天輪去到最高點嘅106公尺~108公尺嗰陣，你可以喺怪談車入面感受到前所未有嘅恐怖體驗⋯⋯

今次嘅怪談車有喺《千與千尋》負責為「千尋」配音嘅演員柊瑠美聲音出演，為大家講述以上呢兩個故事。

驚唔識聽日文無恐怖氣氛？你可以掃描怪談車内各個角落嘅QR code，觀賞各個番外篇動畫。

「史上最恐のHEP FIVE HALLOWEEN」
日期：即日起至10月31日
時間：11:00～23:00（10/18將於18:00開始營業）
費用：¥800（此為特別搭乘費用）
定員：4人

Photo from HEP FIVE

Photo from HEP FIVE

除咗怪談車之外，10月20、21號喺Hep Five消費滿1000円，就會獲贈一份由中西怪奇菓子制作嘅「恐怖點心禮物」，兩日共派444份，由11:00開始發放，贈完即止。

Photo from HEP FIVE

10月27、28號仲有免費嘅現場預約萬聖節化妝服務添！由11:00到20:00，等大家可以感受下萬聖節氣氛！

地點：Hep Five 1/F入口廣場

喺高空聽恐怖故事咁特別，鍾意恐怖刺激嘅朋友唔好錯過啊！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）