8、90後同00後7大回憶各有不同！Xanga/ICQ變抖音 哈日/哈韓好大分別！

而家好多人都話00後同以前好唔同，好多童年回憶、生活習慣、潮流文化等，都隨住科技同社會變化而有所差距。究竟同90後相差10年嘅00後，究竟可以有幾唔同？等小編帶大家睇下啦！

其實每一代喺其他人眼中都總會有啲瑕庇，例如90後會比人話係被遺忘嘅一代、00後會比人話無知等等，不過無論生於邊一代都好，都總會有好有壞，但最重要係必需要擁有屬於嗰一代人嘅特別回憶啊！

一、8、90後：Xanga、ICQ  vs  00後：IG、抖音
Xanga同ICQ簡直係8、90後曾經最著迷嘅網上社交平台啊！不過而家唔單止Out咗，連個網頁/程式都無埋啦，即使而家想登入去回味，都已經無機會啦⋯⋯

Photo from FB@Xanga

相信一眾曾為Xanga、ICQ而瘋狂嘅朋友，喺Xanga入面最深刻嘅，一定係一堆自己或朋友精心設計嘅閃字、完全火星到睇唔明嘅語句、同埋懶有個人特色嘅頁面設計啦！而ICQ最經典嘅當然係Status永遠都係一堆奇怪符號再加一句MK到入心入肺嘅愛情金句⋯⋯

Photo from windows10download

而家00後多都係用IG、抖音為主，其實IG而家都變成8、90後常用嘅社交平台，但可能都依然係Facebook比較多。而8、90後應該真係好少人玩抖音啦，不過有時抖音啲片真係幾搞笑！

Photo from FB@抖音

二、8、90後：每日一篇/小校園/星願小王子  vs  00後：補習、興趣班同補習
要講到課外學習平台，8、90後一定會接觸過「每日一篇」啦，每日都要睇一篇文章，再答幾條問題，而家諗返起其實呢種學習方法都唔錯啊！而小校園同星願小王子可以話係邊玩邊學習啊！唔知大家有無試過父母唔比玩電腦，就話要上「小校園」同「星願小王子」做學校網上功課，而偷偷玩電腦呢？

Photo from 每日一篇

Photo from 小校園

而00後唔知又有興唔興上每日一篇、小校園同星願小王子呢？不過而家社會比以前更偏向着重成績，除咗要面對大量功課，學校以外多都係補習，甚至瘋狂上興趣班，以求子女有多啲技能增加競爭力，所以應該大部分00後都係補習、補習同補習多過網上邊玩邊學啦⋯⋯

Photo from 星願小王子

三、8、90後：線上遊戲平台、跑Online  vs  00後：電話遊戲APP
「線上遊戲平台」呢幾隻字，相信所有8、90後一聽到呢個話題就可以講足幾日幾夜啊！入面有好多唔同遊戲類型，男女都啱玩，簡直係做完功課後一定要上嘅網頁啊！當中仲有好多難忘嘅遊戲例如「女友急住化妝」、「整蛋糕比男朋友」、「無個性戰隊」等，好多都好難忘啊！

Photo from 整蛋糕比男朋友

Photo from 無個性戰隊

如果有8、90後唔接觸線上遊戲平台，咁就一定係玩開跑Online、勁舞團、尼奧寵物大啦！小編記得當年一放學，好多同學仔都會三五成群落網吧「挑機」！

Photo from FB@跑Online

Photo from FB@尼奧寵物

而家科技發達，電話都有好多遊戲玩啦！00後多都係玩電話APP，例如食雞Pubg、Fornite、傳說對決等，而家搭車、等車、等食飯都可以隨時隨地打機啦！

Photo from PUBG

Photo from PUBG

四、8、90後：SMS、煲電話粥  vs  00後：WhatsApp
SMS而家真係好少人用啦！而家講返起總係會覺得好搞笑，以前SMS限制大，一個簡訊最多只可以打160個字元，而且唔同電話卡台仲要收錢添啊，以前真係每個訊息send出去都好珍貴，仲要惜字如金啊！拍拖果陣仲會因為同台免費而買電話卡、轉台等，有時為咗慳錢，同朋友、另一半仲會煲幾個鐘電話粥，諗起都好好笑！

Photo from FB@Nokia

而家科技方便，任何時候都可以上網，WhatsApp成為咗大家嘅常用通訊工具，可以免費無限任Send Emoji、訊息、而家仲有Sticker添！真係越嚟越方便同多嘢玩啊！

五、8、90後：雜誌、漫畫  vs  00後：手機
8、90後童年未有太高科技嘅電話，所以電子零件上嘅娛樂相對較少，不過仲好中意睇雜誌、漫畫！例如老夫子、多啦A夢、金田一、柯南等，相信都係睇書多！仲會買休閒雜誌睇，雖然而家都有唔少雜誌，不過除咗少咗好多之餘，都已經買咩人會買書睇啦⋯⋯

Photo from 《老夫子》

而00後有好似百寶袋咗嘅手機，打開手機無論係資訊、娛樂、遊戲咩都有，所以更加少去買/租漫畫書、雜誌睇啦！

六、8、90後：MK妹  vs  00後：偽韓妹
幾年前一落旺角總有一陣「MK味」，因為身邊好多都係「MK仔」、「MK妹」，簡直就係香港文化之一啊！好多人都中意着短褲、露肩上衣、高踭鞋等，髮型當然要兩邊有條又長又厚嘅頭髮，前陰同樣厚到好似紫菜咁，仲有好多人會做負離子拉到頭髮直一直！同而家嘅「偽韓妹」感覺好唔同！

Photo from IG@punkhippie

而家嘅後生仔女反而因為中意韓國文化，打扮多數都係跟足韓國，特別係空氣瀏海、鮮豔嘅唇色、一字眉等打扮，服裝都係買韓國出口嘅多，去旺角再搵唔到「MK妹」，反而多咗好多「偽韓妹」。

Photo from IG@EXO

七、8、90後：哈日文化  vs  00後：哈韓文化
相信1995年前出細嘅朋友都曾經歷過哈日潮流最豐盛嘅年代！Yui、XJapan、大塚愛、Arashi都係曾經喺香港風靡一時嘅日本偶像！電視劇更加唔洗講，例如《女王的教室》、《一公升的眼淚》、《十四歲的媽媽》等等，聽到個名都即刻有印象啊！

Photo from 《女王的教室》

Photo from 《一公升的眼淚》

而家多數都係哈韓為主，明星就例如少女時代、防彈少年團、EXO等，劇集多都係類似Running Man嘅綜藝節目、《來自星星的你》、《主君的太陽》等等，日本劇集已經少咗好多會喺電視播放啦⋯⋯

Photo from FB@RunnningMan

小編覺得其實無話邊個年代嘅人生活得特別好或壞，相信每一代嘅回憶都好唔同，最開心嘅係同朋友、重要嘅人一齊經歷嘅點點滴滴啊！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）