港珠澳大橋往返澳門交通全攻略 一文睇晒三大交通工具價格/車程時間

上月底通車嘅港珠澳大橋令唔少去澳門嘅香港人多咗交通選擇。咁喺港珠澳大橋通車嘅情況下，想去澳門邊種交通工具最啱你？小編為大家整理各種交通嘅收費同埋所需時間，睇下邊種最適合你！

Photo from 港澳一號

去澳門嘅交通主要有三種：口岸穿梭巴士、直通車同埋高速船。等小編分析下佢哋嘅優劣之處～

1. 24小時口岸穿梭巴士

Photo from HZMBus

口岸穿梭巴士有「港澳線」同「港珠線」兩條路線，票價係3種交通工具入面最平，成人由香港出發到澳門日間只需港幣$65，夜間就收港幣$70。

Photo from Presslogic

由香港至澳門車程大約係45分鐘，不過呢個時間係未計由香港各區去口岸嘅車程。要前往口岸搭穿梭巴士，可以乘搭龍運機場巴士或城巴機場巴士，部分機場巴士路線抵達機場之後會前往香港口岸。

除咗機場巴士之外，仲可以喺欣澳、東涌站搭全新路線巴士去香港口岸。

Photo from HZMB

Photo from HZMB

穿梭巴士嘅班次都算頻密，繁忙時間約5～10分鐘一班，非繁忙時間同深夜就維持15～30分鐘一班。不過乘客只限帶一件行李，而行李唔可以帶超過64厘米 x 41厘米 x 23厘米，重量唔可以超過10公斤，而且無託運服務，想玩多幾日或者有大型行李嘅旅客可能就有啲唔方便喇。

2.直通巴

Photo from 港澳一號

由香港去澳門嘅直通巴主要有兩種：「港澳一號」、「港澳快線」。

「港澳一號」由觀塘apm出發，可直達澳門威尼斯人、金沙等酒店。車程大約1個鐘頭45分鐘（連埋清關）。車票日間單程$170，夜間同星期六日全日單程$190。適合住喺東九龍嘅朋友仔。

「港澳快線」起點喺九龍圓方，途經太子，直達澳門威尼斯人、金沙、星際、銀河、新葡京等多間酒店。車程大約1個頭40分鐘。車費單程$160，深宵、星期六日及紅日另收附加費$20。巴士上亦設有免費wifi同充電裝備，啱晒鍾意玩手機嘅人～

不過直通車去到香港同澳門兩個口岸都要落車清關，而且班次相對嚟講無咁密。

3. 高速船

Photo from 噴射飛航

以前「過大海」都係搭船多，港珠澳大橋開通之後，船飛未見減價，香港往澳門平日普通位每程收費$171，回程澳門往香港每程$160，來回合共$331。周末及假日普通位每程收費$186，澳門至香港則為$175。班次約15分鐘一班，船程大約一個鐘。

搭船相對嚟講價錢比較貴，不過澳門船票都有唔少優惠，例如：生日優惠、信用卡買去程送回程、或者用微信優惠等等，所以計返其實都相差唔大。搭船比較適合住喺港島嘅市民。

大家可以參考下以下呢個表，睇睇邊種交通工具最適合自己！

Photo from Presslogic

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）