鄭中基透露《龍咁威》出年拍第三集 原班人馬歸位 目標做後年賀歲片

鄭中基嘅《龍咁威》系列係唔少香港人嘅集體回憶，「一係唔威，一威就要龍咁威」、「瑞士山區肺」呢啲對白簡直係經典中嘅經典！事隔十多年，鄭中基接受雜誌訪問就透露，將會開拍《龍咁威3》，再為大家發放笑彈。

鄭中基表示，《龍咁威3》原本打算今年年中開拍，2019年賀歲檔上映，不過而家計劃改為出年年中開拍，目標喺2020年賀歲檔同大家見面！電影將由鄭中基同谷德昭聯手執導。

Photo from Ronald Cheng 鄭中基@FB

Photo from 龍咁威

而演員陣容方面，有指《龍咁威》第一集嘅原班主角演員會全部歸位，包括鄭中基、李璨琛、張達明同埋女主角鄧麗欣。不過，鄭中基就話而家仲同Stephy夾梗檔期，希望佢可以繼續演出。

Photo from Stephy 鄧麗欣@Fb

不過即使主角們全部回歸，有啲演員喺《龍咁威》系列嘅演出只能成追憶，好似係去年離世、喺《龍咁威2之皇母娘娘呢》演奀妹嘅魯芬。

Photo from 龍咁威2之皇母娘娘呢

想當年《龍咁威》以絕核搞笑諷刺時弊，相信大家都好期待《龍咁威3》會為香港人帶嚟更多驚喜！

Photo from 龍咁威

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）