女兒替母親越洋網上尋人成功！難忘50年前麗琪餅店緣份 網絡6日內尋回！

喺5、60年前資料科技仲未咁發達，遠方聯絡未有咁方便，每一次見面雙方都會非常珍惜，每一次「再見」都有機會變成「再也不能見」。直至而家科技進步，互聯網世界令人與人之間嘅交流變得又快又容易，有人話科技令人與人之間越漸疏離，但同時都不能忽略，網上世界嘅方便都聯繫咗各方各地朋友，甚至一段50年前嘅緣份。

喺上星期二(11月6日)，網友Selina Wong於Facebook群組「Hong Kong in the '60s」內發Post尋人，細心一睇原來呢位網友Selina Wong居住英國Sheffield，替母親Nancy Wong尋找50年前嘅一段緣份。

Photo from FB@Hong Kong in the '60s

Nancy Wong舊名為Lance Tam，50年前喺尖沙咀「麗琪餅店」工作，當時每日都總會有位名叫Danny禤永釗嘅男孩子到呢間餅店買麵包，但其實重點不在於買麵包，而係為見Lance一面。

Photo from FB@Hong Kong in the '60s

當時Lance只得20歲，而Danny只得18歲，Danny每日都會踩電單車搵Lance，並載佢返屋企，但青春總係帶着絲絲害羞不敢言嘅愛意，所以大家都唔敢拖對方嘅手，亦一直唔敢表白。

Photo from FB@Hong Kong in the '60s

直至半年後，Lance一家需要移民英國，Danny決定喺Lance離開前表白，可惜無親口講，而係將心中所思寫喺相片背後：「I love you forever, and I’ll never change my mind, never! (我永遠愛你，而且不會改變，永遠都不會！)」。

可惜當時科技並不發達，大家身在遠方，想再見都無法聯絡，從此彼此消失喺雙方世界中。

Photo from FB@Hong Kong in the '60s

50年後，Nancy仍難忘那段充滿青澀嘅緣份，即使大家再成不了雙方嘅另一半，都想做回朋友。於是Nancy女兒Selina決定越洋網上尋人，試下可否靠互聯網嘅威力尋回50年前嘅愛情，結果唔洗用上一星期，已有完美結局啦！

Selina喺群組「Hong Kong in the '60s」發文後，隨即成為網上熱話！除咗有唔少傳媒報導外，多位網民亦出一分力轉發，希望故事中嘅男主人翁Danny會見到Nancy同佢女兒正尋找緊佢啊！

Photo from FB@Hong Kong in the '60s

結果不到一星期，喺5日後嘅星期日(11月11日)，Selina再喺原文上回應，透過朋友嘅朋友已聯絡到Danny，Danny同Nancy仲已經相約共聚，仲去咗飲茶添啊！雖然Selina只喺網上post咗二人雙手飲茶踫杯嘅相片，但唔知點解已經睇到小編好感動啊！

Photo from FB@Hong Kong in the '60s

Nancy同唔少網民都異口同聲讚嘆網絡世界嘅威力，大家都唔敢相信竟然靠互聯網威力，6日內已經可以搵到失散50年嘅感情。佢哋仲話二人會嘗試繼續保持聯絡，50年後尋回呢段感情，雖然二人身分地位改變，唔再喺從前甜密嘅愛情，但能做返朋友，都算係一總緣份啊！

除此之外，Selina仲喺文中表示，Nancy除咗搵返失散50年嘅Danny之外，仲聯絡返失聯24年嘅表親戚，緣份同網絡世界真係好神奇啊！

希望佢哋日後都可以保持聯絡啦！

圖片來源：FB@Hong Kong in the '60s

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）