【網絡力量】柬埔寨語言神童今獲紅十字會捐助 仲被內地邀請上節目

近日柬埔寨一名男童輕鬆用10種語言，向女遊客推銷紀念品嘅影片喺網絡爆紅，網民都驚嘆男童語言天份奇高，若果能夠脫貧、獲得栽培嘅話必定係可造之材。男童因影片爆紅而受到關注，今日更獲紅十字會同多個慈善機構捐助，仲獲北京邀請上節目！

男童名叫Thaksin，雖然身形瘦小，但其實已經14歲。佢同比自己細3歲嘅弟弟Tol Tithyya都精通多國語言，佢受媒體訪問時表示，自己平時朝早返學，下午放學後就會賣紀念品幫屋企賺錢，讀書成績都唔錯。可見Thaksin除咗有天份，仲非常生性。

Photo from Venus Gwc@FB

Photo from តាំង គីមឡេង@FB

唔少網民睇過影片都表示想幫助Thaksin。今日佢同弟弟就獲柬埔寨紅十字會捐助金錢同食物，希望能幫到佢哋生活。而且又有當地慈善機構俾佢哋喺玩具店「任揀玩具」做禮物，俾兩兄弟滿載而歸。

Photo from 星洲網

Thaksin話自己喜歡中文，佢喺影片中識講廣東話，同用國語唱《我們不一樣》，而佢近日受內地媒體訪問時，以全中文對答都非常流利，認真厲害，仲識唱《學貓叫》，又自言希望到北京升讀大學。

Photo from តាំង គីមឡេង@FB

有傳有北京電視台已安排Thaksin一家上節目，全程提供住宿及旅費，同埋有傳相關人士邀請Thaksin演唱，甚至有機會出唱片。相信對於熱愛中文嘅Thaksin嚟講，係一個難得嘅機會！

Photo from Venus Gwc@FB

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）