子華表明唔同意實名制買飛嘅打擊黃牛措施 憂慮會侵犯私隱

近年嚟有唔少歌手開演唱會，都引嚟黃牛黨炒賣門票，令到買唔到飛嘅歌迷苦不堪言。特首林鄭月娥之前曾經承諾會檢討法例，打擊黃牛。

現時根據法例《公眾娛樂場所條例》第6條，任何人如果以高於原價炒賣門票，一經定罪可處罰款港幣2,000元。不過現時條例並唔包括政府場所，所以炒賣紅館伊館嘅門票係唔違法嘅。

而罰款亦都過低，唔足以阻嚇黃牛，所以民政事務局上個月向立法會提交文件，推出措施打擊黃牛。

Photo from shutterstock

措施包括將紅館伊館納入《公眾娛樂場所條例》，炒賣相關黃牛飛，將觸犯法律；調整內部認購門票比例；建議以實名制購票。

今年7月喺紅館開《金盆?口》棟篤笑嘅子華神，深受炒飛影響。因為呢場係佢收咪之作，令炒飛情況更加嚴重，唔少fans根本買唔到飛，苦不堪言。

Photo from 黃子華—子華本部 facebook

當時子華就拍片話寧願見到空凳都唔想人炒飛，呼籲fans唔好買黃牛，同時呼籲政府研究措施打擊黃牛。

而政府推出有關措施之後，子華首度回應指唔同意實名制：「我個人係唔同意實名制，因為我個人認為呢個係對私隱權嘅一種侵犯嚟。」

Photo from 黃子華—子華本部 facebook

不過子華話同意要檢討娛樂場所嘅條例，對黃牛黨嘅懲罰要有阻嚇性。

大家又點睇呢？

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）