細細個玩Facebook嘅習慣 tag人填個人問卷 check in......你係咪都做過晒？

越來越發現，依家用Facebook嘅習慣同以前好唔同，好多人依家用Facebook都只係間唔中碌吓post吓自己嘢，又或者follow啲網媒page，得閒碌吓睇吓咁。唔似以前係留意自己朋友近況。咁當然啦，都仲係有人保留住呢啲習慣嘅～只係無以前咁多囉～突然諗返起細個讀書時期玩Facebook嘅一啲習慣，唔知你自己或者你嘅Facebook朋友係咪咁樣呢？

Photo from shutterstock

1. 「tagged by....被點到的必填...」

Photo from PressLogic

記得以前成日被呢啲note洗版，成個wall都係呢啲邊個tag咗阿邊個，阿邊個又被邊個tag咗嘅問卷。通常都係一啲畀人哋更加了解自己嘅問題要你答。例如「10個你最愛的人事物和10個你最討厭的人事物」，又或者係一堆問題，例如「你依家聽緊嘅歌」、「你吹蠟燭的日期」，而最後最後一定會有呢條「tag10個朋友」。其實以前真係幾鍾意玩㗎，最正係當時明知要答成50幾題都肯開始嗰吓佩服自己，畀著依家，應該好多人都「睬你都傻啦」！

2. 喺人哋wall開post對話

Photo from PressLogic

嗰陣同朋友對話係唔知點解死都要去對方個wall度post，仲要逐句逐句，你講一句，佢又去返你個wall開post覆一句，係要畀晒全世界知道你哋傾緊咩咁。老實講小編依家睇返係完全唔知講緊乜㗎！（講明先小編係女性，多謝～）

3. 複雜的Relationship

Facebook有一個set relationship嘅功能，小編記得好多朋友都非常善用每一種關係。通常「In a relationship with...」都唔係真係自己另一半，而係自己嘅閨蜜...

4. tag人

Photo from PressLogic

係講緊一張好多人嘅圖，洗晒版。通常係一個課室，有一班同學，好似小丸子嗰啲，而每個同學都有稱號，然後你就會根據返自己班相對應嘅人tag返佢哋～ 小編記得一定有一個叫「透明人」

5. 開「每月album」+ post晒活動所有相

以前係會每月開一個album，然後post返嗰個月嘅相入去。嗰陣唔係好似依家玩IG咁，精選一張或者幾張最靚嘅入去。而係所有相都post晒，即係同同一個人但10幾個唔同poses都會post晒上去，唔理張相有唔fail。

而每月album唔係以「一月」、「二月」咁樣命名，而係「>1<」、「II<3」、「叁·3」。

6. Check-in

依家係post相嘅時候順便tag埋個地方名，但嗰真有check in呢個功能嘅時候，就會特登check-in嗰個地方，話畀人知自己喺邊。

7. 遊戲邀請

以前仲係好多人喺電腦玩game嘅年代，每日都收到Facebook遊戲嘅邀請，無論係邀請你玩嗰個遊戲定係好似之前好興嘅Candy Crush咁，「R」人畀心心畀車飛。不過依家少咗好多啦～

依家諗返起都覺得好青春，小編碌返咁多年前自己啲post睇，雖然真係打晒冷震覺得好老尷，但同時都覺得好有回憶。得閒碌返黎睇，當回味吓當時囉～～

Photo from shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）