研究發現地球深處藏「超級生態系統」！生物總重量超全球人口總重量200倍 仲代表外星物種有存在可能？！

宇宙總係予人一種奇幻而又深不可測嘅感覺，不過其實唔止宇宙，連宇宙間同大家最親近嘅地球，一樣存在好多未知同絕對估唔到嘅事啊！而近日就有美國科學家發表一份研究，指出原來地球深處存在一個「超級生態系統」，體積仲要係全球海洋嘅2倍啊！

Photo from Shutterstock

美國地球物理聯合會喺12月10日，公布一份由「深碳天文台」(Deep Carbon Observatory)研究人員撰寫嘅研究報告，當中提到呢個「超級生態系統」嘅體積除咗相當於全球海洋2倍，所存在嘅生物總重量更加係地球總人口嘅幾百倍，聽到都嚇死寶寶啦！

Photo from Shutterstock

呢份咁驚人嘅研究由52個國家共派出1200位來自地質學、微生物學、化學同物理學嘅專家，共同花上10年時間完成嘅，所以都絕對有公信力㗎！

Photo from Shutterstock

不過大家又唔洗太緊張，研究指系統當中嘅生物大多數係細菌，由於埋藏喺地底，無受到任何外界干擾，所以生物仍處於古時狀態。

Photo from Shutterstock

研究人員主要係透過深入地底以及海底嘅鑽探井資科，重塑出地球深處嘅生態系統模型。專家估計大多數生物都係細菌及古細菌等微生物。

Photo from Shutterstock

由於當中嘅微生物數量非常多，而且有專家指出其生物多樣性分分鐘高於地球表面嘅生物多樣性，總重量估計有約150-230億噸啊！足足係全球人口總重量嘅245-385倍！

而微生物生活嘅「地底生物圈」超過20億立方公里，即大約相等於全球海洋嘅2倍！

Photo from Shutterstock

據有參與研究嘅田納西州大學教授洛德(Karen Lloyd)所講，全球有7成微生物都係生活於地底，其中一種名為「甲烷桿菌」嘅微生物，更已喺地底2.5公里存在數以百萬年，呢種微生物毋須陽光，新陳化謝率極低，幾乎長時間處於休眠狀態，相信已生存咗數以千年計。

Photo from Shutterstock

而俄勒岡州立大學教授科爾韋爾(Rick Colwell)就指出，呢份研究代表外星物種有存在嘅可能性，如果能夠喺地球發現有生物毋須陽光、單靠礦物就能生存，咁可以合理假設其他星球嘅地底同樣會有類似生物嘅存在。

圖片來源：Shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）