元宵節巧遇「超級滿月」！跨越世紀的浪漫重逢 錯過後要2081年再相見！

農曆正月十五又謂元宵節，即係中國情人節，每每到呢個日子，甚少出現送花送朱古力嘅環節，而係到公園賞花燈、猜燈謎、食湯圓等，非常浪漫。而今年元宵節更係浪漫倍增，除咗有情人終成眷屬，連元宵節都可以再次同闊別世紀嘅「超級滿月」重逢，大家外出賞花燈之餘，記得不忘欣賞滿月之美啊。

Photo from Shutterstock

「超級滿月」將於明晚(2月19日)11點54分出現，為今年最大滿月，而且剛好碰巧元宵佳節，絕對係自20世紀以來首次「重逢」，如果錯過今次，就要到2081年先可以再相遇啦，所以一對對情侶不妨停落嚟，一齊望向星空欣賞滿月，相信係有生最浪漫嘅元宵節啊！

Photo from Shutterstock

月球以橢圓軌道運行，並圍繞地球公轉，當行徑最接近地球嘅時候，同時又喺日地聯線上，就會出現「超級滿月」。而「超級滿月」其實並非專業名詞，天文學家多稱之為「近點朔望月」，所以「超級滿月」有指「滿月與近點月同時發生嘅近點朔望月」。

Photo from Shutterstock

而有天文學家表示，是此「超級滿月」除咗巧遇元宵節，更係「年度最大最圓」月亮，而最圓一刻將出現於明晚11點54分，而今年月球距離最近一刻則為下午5點03分。

Photo from Shutterstock

可惜近日時有驟雨，雲層較多，月亮可能只會喺雲層間若隱若然咁出現，能見度會降低而影響賞月，不過小編就認為不論月亮大小，只要係同身邊最重要嘅人一齊欣賞滿月，就係最完滿嘅元宵節！

Photo from Shutterstock

而天文台曾表示，人肉眼好難看得出「超級滿月」嘅月球直徑比平時有所變大嘅差距，反而日出或日落之時，有景色及建築物作襯托同比較，視覺上會顯得較大，所以如果想欣賞滿月嘅最佳時刻，不妨於日出或日落同另一半一齊睇啦！

Photo from Shutterstock

這次跨越世紀嘅浪漫重逢，不禁令小編回想起日本作家夏目漱石，將「我愛你」英文譯作「今晚月色真美」，而香港也有一首為人熟悉嘅《月亮代表我的心》，襯今次元宵佳節巧遇「超級滿月」，不妨向心儀對象或自己嘅另一半，輕輕用「月亮」說出心底話！

圖片來源：Shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）