史上第一登山狗！浪浪尾隨登山隊 成首隻狗狗登上喜馬拉雅山！

登山都好多人而言都係一種極限挑戰，特別係處於一個唔熟悉嘅地方，要顧及身體狀況隨環境轉變之外，天時地利人和都成關鍵之處。而擁有最多高峰嘅喜馬拉雅山山脈，算係大部分登山挑戰者嘅目標。近日就有一登山隊成功登上海拔7千多米嘅Baruntse山峰，除此之外，一隻尾隨嘅流浪狗都挑戰成功，成為史上第一登上此高峰嘅狗！

Photo from FB@Don.wargowsky

喜馬拉雅山脈聳立於西藏高原，橫跨尼泊爾、中國、印度、不丹及巴基斯坦5個國家，山峰高度平均海拔6千米，其中有40座高峰則海拔7千米以上，而Baruntse山峰係其中一座達7千米級別嘅山峰。

Photo from FB@Don.wargowsky

呢隻流浪狗於尼泊爾居住，可能因習慣生活於高海拔地方，登山時完全無高山反應，而且仲可以活躍地亂跑亂走。喺去年11月，有一行10人嘅登山隊打算喺攀登Baruntse前，先完成一座Mera Peak，當中有隻黑色長毛流浪狗走向佢哋，而且仲緊緊尾隨隊長旁邊，其後登山隊員決定畀呢隻流浪狗加入，成為佢哋嘅「登山隊員」。

Photo from FB@Don.wargowsky

不過登山路絕對唔容易，好多地方都係懸崖峭壁，仲要跨越一個個冰川以及山坡，加上海拔隨之而慢慢上升，身體難免越加吃力。不過呢隻浪浪彷彿擁有一顆堅定嘅決心，再難行嘅路都成功畀佢一一走過。

Photo from FB@Don.wargowsky

有一次因為地勢險峻，即使係人行都有困難，莫講話要照顧同行犬隻，所以登山隊決定將浪浪綁喺營地。點知呢隻充滿無比意志嘅浪浪咬斷繩索，隨即跟上登山隊，登山隊員見到浪浪嘅意志，協力幫助牠順利渡過一個又一個難關。

Photo from FB@Don.wargowsky

當登山隊同浪浪上到海拔6千多米，浪浪意外地摔斷腳甲，流血不止。不過浪浪面對傷患，都唔當係一回事，仍然憑信心繼續前行，浪浪就好似搵到自己目標同去向一樣，無懼任何阻攔，堅決與登山隊同行，最後成功攀上7千米高峰。

Photo from FB@Don.wargowsky

浪浪同登山隊一同登頂，成為史上第一狗登上Baruntse高峰。正常情況下一般人於海拔約3-4千多米急步行，已經有機會出現高山反應，而動物都一樣，而且犬隻習慣奔跑，遇上高山症時同人一樣都會出現頭暈、嘔吐、疲勞症狀。不過呢隻登上浪浪完全無以上問題，而且登山時充滿自信，有唔少人都認為可能同藏獒基因有關。

Photo from FB@Don.wargowsky

而浪浪最後得探險隊基地陣營嘅領隊Kaji收養，並改名為Mera，與Mera Peak同名。Mera靠自己嘅意志感動人，領隊Kaji給牠一個家，從此唔需要再四處流浪，Mera亦給予所有登山隊成員一個鼓勵、決心與希望。

圖片來源：FB@Don.wargowsky

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）