網民嚴選伏工10大特徵！不斷延長試用期準時走畀同事問「做乜早走？」

時事熱話生活熱話

By Jackie on 11 Apr 2019

Digital Editor

全職寫字，副業畫字，打算一輩子揸筆揾食，畫筆鉛筆雙兼得。「唔化妝襯衫唔出門症」末期患者，童真外表掩飾內心麻甩思想，夢想是在大學畢業後退休，顯然失敗。

相信有唔少人都不求搵份自己又中意、又返得開心嘅工，只求唔好搵咗份伏工啊！最近就有網友分享一人一個伏工特徵，好多人都話好有共鳴！臨近畢業季，各位Fresh Grad新鮮人以及想轉工嘅打工仔，真係要好好記住以下10大伏工特徵啦！

Photo from Shutterstock

1. 日日有散水餅食
返工無幾耐已經有唔少人Last Day派散水餅真係伏中之伏啊！短短返工一兩個月已經有唔少同事辭職，證明公司流失率高，留唔住同事，或者公司內部有問題令好多同事返無幾耐就想走。

Photo from Shutterstock

所以如果返工無耐已經食過好幾次散水餅，真係要好好刺探軍情，了解下辭職同事究竟係做得耐想轉新環境，定有口難言咁款啦⋯⋯

Photo from Shutterstock

2. 招聘網站長期出現同一公司、同一職位請人post
如果睇咗一兩個月同人招聘網站，依然見到同一公司、同一職位經常出Post請人，咁即使對嗰個職位有興趣，都要先三思而後行啦！

Photo from Shutterstock

經常出Post請人多數因為無人見工而請唔到人，又或者老闆好嚴揀極都唔中意！特別係隔一、兩個月又見到同一個Post，好有可能係之前請咗人，新同事返工無幾耐就辭職啊！

Photo from Shutterstock

3. 到收工時間但無同事放工，準時走畀同事問「做乜早走？」
通常搭正放工時間無同事走都算正常事，不過可能過咗半個鐘至一個鐘都未有同事放工，咁就真係大件事啦！

Photo from Shutterstock

放工時間無同事放工，搞到自己即使做曬所有工作都唔敢放工，甚至準時放工時間走，仲會有同事反問你「做乜早走？」，咁好大機會證明呢間公司有返工時間，但無放工時間，係無了期OT啊！

Photo from Shutterstock

4. 例牌OT無補水又無補假
喺香港做打工仔，OT仍正常事，大部分有良心嘅公司通常都會設OT補水或者補假，即使迫於無奈要OT都起碼有補償啊！不過有部分公司奉旨要同事OT，無補水又無補假，甚至明明係工作量過多，上司都依然矛頭直指係因為你做嘢手腳慢先要OT，咁就真係OT都欲哭無淚啊⋯⋯

5. Send CV後好快見工再好快請
可能有唔少人都試過Send CV後公司好快叫你見工，然後見工一兩日後，甚至即日已經通知話請你，呢個時候先唔好以為自己真係好畀老闆賞識，更多係要先諗清楚見工時老闆嘅表情、言語間係咪真係視你為「對的人」所以咁快決定請你。

Photo from Shutterstock

因為好大機會係公司無人見工、好等人用而亂請人，嗰頭面試西你面呢頭話請你，咁可想而知份工有幾伏啦⋯⋯

Photo from Shutterstock

6. 全部同事返工苦口苦面/日日有同事上網搵工
返到公司見全部同事苦口苦面，大家都無乜交流，通常一係部分同事難相處、一係上司唔畀同事傾閒計、一係份工太辛苦所以每日都西口西面啊！不過都有可能因為朝早返工攰唔想講嘢，但如果同事們長時間處於粒聲唔出又黑口黑面嘅狀態，相信大家返工都辛苦啦⋯⋯

Photo from Shutterstock

特別係不斷有同事上網搵工，證明公司無留底嘅理由，大家都諗住搵到工即執包袱走人啊！

Photo from Shutterstock

7. 不斷延長試用期
初返新工通常都會有試用期，不過如果上司不斷延長你嘅試用期，好有可能佢都唔認同你嘅工作能力，但又請唔到人頂替，或者唔想過試用期加人工畀你！而且過試用期通常都一係留一係走，最多延長一次，如果不斷延長試用期，咁真係要好好諗下筒中原因啦。

Photo from Shutterstock

9. 幫上司做私人嘢
有部分上司間唔中要你幫佢Book下餐廳、訂演唱會飛等等，經常性要幫佢做私人嘢，甚至要幫佢家庭日常開支埋數，感覺公私不分，仲可能當你係私人秘書或阿四，結果好大機會咩都要你幫手做，連私事都要負責埋啊！

Photo from Shutterstock

10. Office裝曬CCTV
喺Office裝CCTV都好正常，不過東一個西一個，老闆仲要喺房不時開CCTV睇，咁絕非安全問題，而係要24小時睇同事做緊咩、有無蛇王等等，一見你唔係做嘢、離開工作位一段時間，就出嚟鬧你偷懶，上司下屬間完全無信住可言，仲有少少畀人監視嘅感覺，無曬私隱，感覺無自由又大壓力。