母子同日卻唔同大學畢業 外國兩校窩心聯手 令兩母子能夠同場領證書

能夠升上大學成功畢業已經唔係一件易事。做咗媽媽再讀大學然後同仔仔同一日畢業嘅機率更加係非常低！

外國有一對母子就讀唔同嘅大學，但同年畢業，仲要係同日舉行畢業禮！媽媽知道之後，諗都冇諗過就毅然缺席自己嘅畢業禮，親身見證仔仔嘅人生大事！

Photo from Central Michigan University

仔仔就讀嘅中密歇根大學（Central Michigan University，CMU）嘅校長知悉呢件事之後，就主動聯絡媽媽讀書嘅學校-弗里斯州立大學（Ferris State University，FSU）校長，聯手安排兩母子同場領取畢業證書。

Photo from Central Michigan University

喺中密歇根大學（仔仔大學）畢業禮上，著上畢業袍同四方帽嘅仔仔Stephan喺台下企起身，媽媽就正正喺佢隔離。當CMU校長頒授學位畀仔仔之後，校長接住宣布已經獲取弗里斯州立大學（媽媽大學）校長同校董會授權，可以現場向媽媽Sharonda頒授佢嘅學位畢業證書。

Photo from Central Michigan University

兩母子表現得非常震驚同驚喜，佢哋兩個相擁，聽住校長嘅宣佈，兩人喜極而泣，感動嘅淚水無法止住，眼淚決提！仔仔更係多次舉起手祝賀媽媽，非常興奮！仔仔話可以同媽媽同場一齊拎畢業證書係最美好嘅時刻！

等到校長宣布完之後，全場嘉賓、學生、、老師、家長都紛紛企起身鼓掌祝賀呢對母子，場面震撼感人！

Photo from Central Michigan University

中密歇根大學將呢對母子嘅畢業相上載到自己嘅Facebook專頁，唔少網民大讚兩間大學處理得好有人性！仲話呢張畢業相好靚，非常有意義！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）