各位，秘笈來了～～睇盡日本環球影城全攻略，教你識清門票類型！！

去大阪除咗心齋橋之外，一定要去嘅景點，非環球影城莫屬啦～～但好多人去完都話排隊排好耐，好多野都玩唔到！山長水遠去到玩得唔盡興咁點得㗎！小編就教精你幾招攻略，等你減少排隊時間，一次過玩多啲野！

Photo from Pinterest

門票類型

任何人都要憑入場券進園，可以當場或者上相關旅行社買！不過如果你唔想排咁耐，咁就要買埋快證啦！好多人誤會有快證就唔使入場券，其實兩者係分開㗎！

Photo from USJ

Universal Express係官網買會平少少，而且官網依家已經有齊中英文，唔驚唔識睇日文～～快證會有配套好嘅遊樂設施，有4或者7樣設施嘅配搭揀， 一個Package咁，可以根據喜好去買

Photo from USJ

減少排隊時間

如果旅費有限唔想買快證，建議提早係開園前到達，做隻Early Bird。因為環球影城每日都會唔定時提早開園，而且去到都要排隊入場，所以提早大約一個鐘去到，就可以一入開衝入去玩啦！好多人第一時間會衝去哈利波特園區拎整理券，即係類似迪士尼嘅fast pass。不過亦都有人話第一批去哈利波特園區嘅人係可以直接入去，前題係6點幾就要出門口先有機會喔！詳情可以參考返開放時間

Photo from USJ

想輕鬆唔使一早起身入場，快證幫到你！不過係最貴嘅方式，快證同入場券差唔多價，適合一家大細親子遊。見住人地排緊隊，但你又可以即刻入去，都咪話唔爽～～

Photo from Instagram

必玩遊戲設備

無疑哈利波利園區一定係No.1！將電影場景實體化，各種魔幻世界呈現你眼前，吸引全球粉絲們到此一遊！如果鍾意刺激嘅機動遊戲，你唔可以錯過飛天翼龍同好萊塢美夢－乘車遊。超推薦飛天翼龍，360大迴轉，真係好似俾恐龍咬住周圍飛，盡情尖叫吧！

Photo from Instagram

好cutecute嘅minions仲會不定時係荷里活園區表演啊！我要瘋狂同佢地影相～～細細粒超得意～～

Photo from Instagram

袋住呢個攻略，環球影城Let's Go！

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）