令人心痛！冰島海灘出現50具領航鯨屍體 專家推測由於潮汐而集體擱淺

冰島係觀鯨嘅好地方，有唔同種類嘅鯨魚喺當地水域出沒，包括座頭鯨、小鬚鯨等，仲有海豚。

不過日前就有直升機機師發現喺冰島Longufjorur嘅沙灘上有多條領航鯨屍體，目測超過50條。

Photo from 法新社

咁龐大數量嘅領航鯨屍體被集體發現並唔常見，屍體所在嘅地方非常隱蔽，甚少會有遊客去嗰度，一般開車係入唔到去。

呢啲相係由直升機機師David Schwarzhans所拍攝，佢話當時唔肯定屍體究竟係咩，以為係海豹或者普通海豚，經過清點後發現有50隻以上，數量可能會更多，因為有部分已經埋喺沙中。

Photo from 美聯社

Photo from 美聯社

機師表示數目咁龐大嘅擱淺領航鯨，遺骸味道好重，情況令人震驚。

Photo from 美聯社

暫時未知領航鯨擱淺嘅實際原因，但海洋生物學家Edda Elísabet Magnúsdóttir就認為當地嘅潮汐同海流強勁，而領航鯨進入淺水區就好易迷失方向，依靠嘅聲波導航喺該地區起唔到作用，令佢哋更難返回大海，然後擱淺。

Photo from Printerest

而且領航鯨係社會性生物，會集體行動，很少放棄同伴，亦都係咁多領航鯨同時擱淺嘅原因。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）