【施政報告2019】林鄭月娥提出填海計劃 指經濟變差會協助企業發展一帶一路內地市場

行政長官林鄭月娥今日發表任內第三份施政報告，提出超過220項措施。

其中林鄭上年宣布「明日大嶼」計劃，將填海興建多個人工島。

今日佢喺「施政報告2019」亦提出多個土地供應措施，以用作房屋發展。但佢亦指有關土地並非取之不盡，所以決定喺「明日大嶼」下嘅中部水域填海，發展交椅洲人工島。

特首指有關人工島填海計劃可以紓緩屯門公路塞車嘅問題，同時亦會提供1000公頃土地，以建立一個新社區。

Photo from Shutterstock

林鄭月娥亦表示明白到部分市民或會對填海政策有疑慮，所以會提供平台俾專業人士同年青人參與人工島嘅規劃設計、了解土地用途，同時為環保、可持續發展措施提出意見，參與其中。佢希望立法會批准佢嘅撥款申請。

除咗交椅洲人工島之外，佢亦提出龍鼓灘近岸220公頃嘅填海項目，希望可以發展沿海地區作住宅用途。

Photo from Shutterstock

另外，林鄭指香港今年經濟係2009年以嚟最差嘅表現，上半年僅輕微增長0.5%。而由7月開始，訪港旅客人數同零售銷售額急劇下跌。

Photo from Shutterstock

消費情況唔樂觀，部分行業包括零售、住宿、飲食業等較受影響，失業率上升，令本地勞工市場面對裁員壓力。

特首表示會為中小企提供支援措施，同時發展「一帶一路」，協助本地企業開拓「一帶一路」市場，向內地推廣產品同服務，幫香港企業進入內地市場。

Photo from Shutterstock

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）