90後創辦「心聆樹窿」設置街站由義工做樹窿聆聽港人心聲

香港自6月起嘅反修例活動開始，社會就不停有各種支持同反對嘅聲音。不同政見嘅人士企喺雙方嘅對立面，就算係一個家庭都有人持不同嘅意見，令彼此喺家中更加壓抑。

有見及此，90後社工黃天樺同大學生楊詠琳就一同創辦義工組織「心聆樹窿HEAR FOR YOU」，喺各大屋邨、地鐵站附近、集會現場等地方設置街站，由義工做樹窿聆聽港人心聲。

一開始之所以會有創立「心聆樹窿HEAR FOR YOU」嘅念頭，係因為社瀰漫住憂鬱嘅氣氛，大家都俾負面情緒影響，但係都無時間梳理自己嘅情緒，整理自己嘅心情。所以喺呢個艱難嘅時刻，佢哋希望可以與大眾同行，緩解大家積存嘅負面情緒，為大家增添生活中簡單而溫暖嘅動力，於是創立義工組織「心聆樹窿HEAR FOR YOU」。

Photo from 「心聆樹窿HEAR FOR YOU」

現時組織一共有8位核心成員，有大約30位社工、輔導員擔任輔導義工，另外有約10位學生擔任社交網站嘅創作團隊。組織強調佢哋不帶任何政治目的，而係希望可以提供一個「樹窿」俾香港人抒發心情，唔洗獨自面對困難。不論立場如何，義工都會盡心傾聽，堅守保密原則，實行「你想講，我會聽」。

Photo from 「心聆樹窿HEAR FOR YOU」

組織留意到現時有唔少網上、電話情緒支援提供，但「面對面」嘅輔導就少之又少，所以佢哋每星期都會申請喺唔同地區設置街站，等義工親身接觸街坊，聆聽街坊內心嘅感受。除此之外，組織更透過Telegram channel提供線上情緒支援，等香港人面對困難時可以即時得到幫助。

Photo from 「心聆樹窿HEAR FOR YOU」

Photo from 「心聆樹窿HEAR FOR YOU」

講到最難忘嘅經歷，一次擺街站時有一位伯伯好激動咁鬧啲義工，又問佢哋：「你究竟係唔係中國人」，但同義工傾談後卻指自己根本無機會同人分享立場，佢擔心年輕人唔願意聽佢講嘅嘢，所以成日喺連儂牆徘徊。同義工傾訴完之後佢反而多謝返義工。

擺咗半年街站，發現街坊講嘅都有一個共通點，就係佢哋講嘅嘢連屋企人都唔知，想法同情緒收埋喺心度好耐，而街站同Telegram channel為壓抑已久嘅佢哋提供第一層舒緩，俾街坊抒發負面情緒，等佢哋知道自己並不孤單，組織仲會同當時人一齊發掘身邊有咩可用資源，包括社區支援或者適合傾訴嘅親友，有需要時會喺獲得對方同意下將個案轉介臨床心理學生或者精神科醫生。

Photo from 「心聆樹窿HEAR FOR YOU」

佢哋指其實肯講、肯聽，每個人都可以成為彼此嘅「樹窿」，互相支持。佢哋又感謝組織義工嘅付出，要成為輔導員需要先經過篩選同電話面試，而且每星期要當值4小時或以上，絕對唔易做㗎！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）