放假一班人必玩！大富翁推出史上最長版本 1日都可能玩唔晒 仲有10分鐘玩完高速版

月尾就係新年，放假大家可能會同親朋戚友一齊聚下。一班人一齊玩party game、大富翁就啱晒喇！

大富翁最近新推出咗一個超長版本，長到1日都可能玩唔晒！

呢個新版本寫到明係「Monopoly LONGEST Game Ever」，連個盒都印咗大富翁騎喺烏龜上面等到瞓著咗。最長版本大富翁究竟有幾長呢？

Photo from Amazon

呢個同玩法有關，平時玩大富翁主要有兩種玩法，1.最後無破到產嘅玩家勝出；2.限時內總資產最高嘅玩家勝出。只要玩法正確，一般個半鐘至兩個鐘就可以玩完成個game。

而最長版本首先喺板圖上已有分別。普通版大富豪板圖只有一圈，但最長版個板圖有兩圈。其實最長版嘅財產同普通版都係一樣：16塊地、4個車站, 2個公共事業，一共22個財產，但最長版每項財產都有3個versions，即係一共有66項財產。

Photo from Amazon

其次，普通大富翁會有兩個骰仔，但最長版只有一個，所以行完一圈嘅時間會更長。

最重要嘅係，最長版要贏必須擁有所有財產。換句話說，無論有幾個玩家破產都無用，一定要有一位玩家買晒板圖上所有財產先可以結束遊戲。

Photo from Amazon

呼應返「最長」主題，啲棋都係用烏龜同兔仔。盒上面仲寫咗：「And you thought the original took forever（你以為普通版要用好長時間玩）」，呢個「最長版」先係玩極都唔完！

除咗「最長版」，仲有推出另一個大富翁「Speed」高速版。

Photo from Amazon

高速版稱可以喺10分鐘之內結束遊戲。一共4輪遊戲，每輪計時進行交易，每位玩家都有一個骰仔，喺交易時可同時擲骰仔買樓。追求速度嘅朋友仔可以試下呢個「高速大富翁」！

Photo from Amazon

Photo from Amazon

大富翁「最長版」同「高速版」都有喺Amazon出售，售價同樣係$19.99美元（約港幣$155）。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）