濕疹患者必睇飲食禁忌/改善方法！轉季皮膚痕癢難耐　除咗敷藥仲有咩可以做？

近日天氣開始轉涼，大家除咗出街帶多件小外套之外，其實每年轉天氣時對皮膚都係一個挑戰，特別係對濕疹患者，事關只要濕疹翻發，皮膚就會變得痕癢難耐，令人會忍唔住手。雖然外敷藥物可以有效舒緩症狀，但唔多唔少藥中都會含有類固醇成分，長期使用始終對身體造成副作用。咁除咁外敷，仲有咩方法可以有效舒緩症狀呢？！

其實濕疹喺香港係一種好常見嘅皮膚表層炎症，每個患病嘅患病時間都唔一樣，而且每個人嘅症狀都唔太一樣，可能會引起痕癢、水泡、紅腫或滲出液體，亦有人會出現皮膚乾燥帶皮屑脫落。其引發原因包括與物質嘅接觸及磨擦、某些食物、藥物以及對真菌感染引致。

Photo from Prinerest

除此之外，中醫學認為濕氣重同燥熱嘅體質都會令濕疹問題加劇，而最有效嘅方法就係戒口，如濕毒食物、奶/蛋類、煎炸、辛辣等一啲容易誘發濕疹發作嘅食品。

常見致敏原：

雞蛋/奶類/大豆製品
雞蛋/奶類/大豆製品對一般人嚟講都係健康食品嚟，但對濕疹患者而言就唔係喇，食物中嘅蛋白質係極常見嘅致敏原，係常見誘發濕疹嘅原因之一。

濕毒食物：

肉類
牛肉、鴨及鵝喺中醫嚟講都係容易加重濕疹病情嘅濕毒食物嚟，濕疹患者喺食用後會容易出現發紅及痕癢加劇，甚至引起發炎。

水果
芒果、榴蓮及黃梨等容易令人體積熱嘅水果，對濕疹患者嚟講都係要盡量避免食用，以免令病情一發不可收拾。

煎炸/辛辣食品

秋冬唔少人都鍾意打邊爐或 BBQ，但食得多就會容易令體內嘅「火氣」增加，令體內嘅熱氣無法排解，從而引發濕疹症狀，所以盡量都係少食為多滋味喇～

另外， 除咗喺食方面要戒口之外，喺生活習慣上都可以改善濕疹症狀㗎！

1. 少接觸化學品
避免使用含化學成分或染料嘅產品。

2. 早睡早起
培養早睡早起嘅生活習慣，人體喺熟睡時會啟動自行修復能力，所以盡能避免捱夜，等身體可以有足夠嘅時間自行修復。

3. 避免浸溫泉
濕疹患者應避免浸溫泉、使用公共浴室或游泳池等等，免受感染。

依樣又唔做得，嗰樣又係嗰食得咪好悶？咁又唔係，除咗盡量避免以上所講嘅食物同生活習慣外，大家平時要只有多菜少肉，多食一啲清熱利濕嘅食物，對舒緩濕疹都會有所幫助。

最後推介多個清熱利濕嘅涼拌小食畀大家～

涼拌黑白木耳

Photo from Prinerest

材料：浸泡白木耳 50 克，浸泡黑木耳 50 克，乾紅椒 1 條，蒜頭或芫荽 適量

調味料：麻油 1 匙，醬油 1/2 匙，鹽 1 茶匙，糖 1 匙，檸檬 1/4 個

做法：黑、白木耳分別洗淨用手摘成小塊，倒入沸水中煮 1-2 分鐘，瀝水備用。乾紅椒切絲，蒜切碎，放入熱油中爆香。將已瀝水嘅黑白木耳，加入調味料中並淋上已爆香嘅紅椒蒜油，拌勻即可。

依個涼拌小食可以一次做多少少放喺雪櫃，作日常小食之用。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）