【西貢香港地質公園】必到萬宜水庫東壩、橋咀洲睇六角柱　交通一覽

By Celia on 12 Oct 2020

Digital Editor

世界很大，生命很短，做自己就好！

依一年大家都不斷回憶可以出外旅遊嘅日子，但其實喺香港都有唔少可以睇靚景同打卡嘅好地方㗎，有啲仲係由香港聯合國教科文組織認證嘅世界地質公園嚟添！趁住週末唔錯嘅好天氣，就去郊區行吓呼吸吓新鮮空氣喇～

香港嘅世界地質公園包括新界東北沉積岩和西貢東部火山岩兩大園區等合共8大景區，佔地5,000公頃。比較多人認識嘅一定係位於西貢東部嘅火山岩園區。

Photo from geopark.gov.hk

西貢火山岩園區中嘅六角形岩柱群及海岸侵蝕地貌吸引咗唔少人專程到去一覽依個大自然奇景。依個六角形岩柱群係現時所知世界上面積和體積最大，岩柱體積直徑平均達 1.2 米，年齡為 1.4 億年前，即晚白堊紀嘅凝灰岩。岩柱群由萬宜水庫東壩延伸至果洲群島，面積達 150 平方公里。岩柱群大部份位於海底，暴露於海岸上則約有 20 萬條。

Photo from geopark.gov.hk

而西貢火山岩園區則分為四個景區：

糧船灣

糧船灣景區位於西貢東郊野公園，距離西貢市中心約20公里，曾多次被遊人評選為「香港十景」之首。糧船灣沿岸一帶佈滿排列整齊嘅六角形火山岩柱，其中以花山沿岸嘅火山岩柱最高，高達100米，堪稱「天然六角形岩柱壁畫」。此外，萬宜水庫東壩亦設有萬宜地質步道及解說牌，介紹多種有趣嘅地貌景觀，包括斷層、扭曲嘅岩柱、侵入岩脈及破邊洲海蝕柱等。

前往交通方式：

巴士
乘坐西貢市中心開出的94號巴士或鑽石山港鐵站的96R巴士（僅在週末及公共假期行駛），經過北潭涌後下車。沿大網仔路前行至岔路口，靠右沿西貢萬宜路繼續步行約9公里；

的士
可於西貢市中心或北潭涌乘坐計程車前往，即可到達位於萬宜水庫東壩的地質步道；或

專線小巴
可於北潭涌乘坐於假日行駛新界專線小巴9A號線往返北潭涌與萬宜水庫東壩之間。

服務時間: 下午3:00 - 下午6:00 (逢星期日及公眾假期服務)
班次: 約隔 20-25 分鐘一班
收費: $11.3

參加本地導賞團：可於火山探知館報名參加東壩半日遊，設「來回程」服務，詳情可向火山探知館查詢（電話：2394-1538)

橋咀洲

橋咀洲位於西貢市中心東南面約2公里，大家可從西貢碼頭乘坐街渡前往，船程約十五分鐘。橋咀洲擁有多種火成岩，包括火山角礫岩、流紋岩、凝灰岩和石英二長岩，是欣賞和學習火成岩的好地方。而連接橋咀洲與橋頭嘅一條由礫石構成嘅連島沙洲，每當退潮時，就會露出水面，大家可沿著連島沙洲步行前往橋頭，一覽清水灣半島與西貢牛尾海嘅靚景。而喺漲潮時，連島沙洲就會被海水浸沒，所以想行吓沙洲嘅大家記得 check 定潮汐時間表喇！

前往交通方式

街渡前往橋咀洲：從西貢碼頭乘街渡前往橋咀洲，展開橋咀洲地質步道行程。

參加本地導賞團：可於火山探知館報名參加橋咀洲與滘西村的導賞團，包括「來回程」服務，詳情可向火山探知館查詢（電話：2394-1538)

甕缸群島

甕缸群島景區由橫洲、火石洲、沙塘口山及吊鐘洲嘅金鐘岩組成。島嶼由具柱狀節理嘅火山岩構成。由於海岸長期受到猛烈嘅風浪衝擊，因此形成獨特嘅外觀，沿岸遍佈懸崖峭壁及海蝕穴、海蝕拱。沙塘口山東南沿岸嘅陡崖係全港最高海崖，高達 140 米。而火石洲高 45 米嘅杬挽角洞、橫洲高 30 米嘅橫洲角洞、沙塘口山高 24 米嘅沙塘口洞以及吊鐘洲嘅吊鐘拱門，合稱為香港四大海蝕拱。