《使徒行者3》林峯馬明再合作　馬國明首演奸角　兩內地演員特別出演

《使徒行者》第一季大獲好評，其後 TVB 開拍《使徒行者2》。延續第一、二季嘅熱潮，《使徒行者3》就嚟開播啦！今次除咗林峯回歸之外，仲係馬國明入行咁耐第一次飾演奸角！劇集除咗動員所有當家小生花旦外，仲有兩位內地演員特別出演，唔知效果係點呢？

《使徒行者》第一季由林峯、佘詩曼主演，大獲好評，林峯飾演嘅「爆 seed」同佘詩曼飾演嘅「釘姐」深入民心。可惜《使徒行者2》冇咗佢哋，加入咗周柏豪、黃翠如及袁偉豪。

Photo from 《使徒行者》

今次《使徒行者3》林峯終於回歸啦！除咗林峯同第二季嘅黃翠如、袁偉豪之外，TVB 仲「大晒冷」，加入咗好多當家小生花旦，包括馬國明、蔡思貝、張振朗及黃智雯等，喺《使徒行者》第一、二季都有出演嘅苗僑偉同許紹雄都會繼續出演。

Photo from 《使徒行者3》

Photo from 《使徒行者3》

馬國明同林峯今次係七年後再度合作，兩人同框出演固然係一大看點，不過馬國明入行咁耐首次正式飾演奸角都係劇集看點之一嚟㗎！佢喺發佈會度仲好開心表示自己好 enjoy 今次做反派，話自己同公司申請咗好多年想演反派，不過公司話佢個樣蠢，太呆，啲人好難信佢係反派，所以唔畀佢演奸角，相當搞笑。

Photo from TVB (official) @YouTube

亦都係因為呢個原因，所以今次劇集入面，馬國明嘅造型都相當型格，染上灰髮，有別於佢一直以來憨直老實嘅形象。

Photo from 《使徒行者3》

今次《使徒行者3》係同內地公司嘅合拍片，除咗動員眾多 TVB 一線演員之外，仲有兩位內地演員特別出演，分別係鄭愷同曾舜晞。

鄭愷憑內地綜藝節目《奔跑吧！兄弟》爆紅，除咗出演綜藝，佢都主演過唔少影視作品，包括《致我們終將逝去的青春》、《前任 2：備胎反擊戰》等。今次佢喺《使徒行者3》入面飾演一個黑幫殺手。

Photo from 《使徒行者3》

曾舜晞係內地出名嘅花美男，因飾演內地版《倚天屠龍記》嘅「張無忌」而爆紅。今次佢喺《使徒行者3》入面飾演「殷天俠」，仲同「釘姐」嘅死有關。

Photo from 《使徒行者3》

《使徒行者3》雲集眾多小生花旦，連客串名單都相當驚喜，包括農夫、麥美恩、謝天華及吳卓羲等，可以話係歷年來 cast 最強勁嘅劇集，真係好期待啊！

Photo from 《使徒行者3》

Photo from 《使徒行者3》

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）