玩殘教練系列！重量級大對決【Kovis瞓身大戰喱騷阿強】Kovis原來係隱藏運動健將：身型同靈活度無關係！（有片）

話說最近真係見到好多朋友突然又行山又跑步又做gym，非常注重健康，簡直就變咗健康小先鋒咁～小編本身就比較懶同怕悶嘅，所以真係少做運動，不過呢排就見到啲運動朋友share幾條由凝動香港體育基金拍嘅《新興運動鬥一番》嘅短片，入面有啲KOL同運動員喺度對打唔同嘅新興運動，有好多笑位之餘，望落又真係好正好好玩咁喎～

呢個《新興運動鬥一番》一共有6集，每集都會以唔同嘅新興運動做主題，再請嚟兩組人馬互相較量。

Photo from 凝動香港體育基金

好似第一集咁，就請嚟之前《後生仔傾吓偈》嘅後生仔——鄧伊程Tiffany同運動節目主持兼旱地冰球球員——曾詩敏Vien，大戰「棍網球（Lacrosse）」～棍網球係團體運動，每位球員都會有一支連網長棍，用嚟裝住個球去傳球、接球同運球，將個波射入對方龍門就得分啦！

Photo from 凝動香港體育基金

一睇呢兩組人馬都諗住係玩開旱地冰球嘅Vien贏硬啦，點知！身為香港女子跳高運動員嘅Tiffany運動細胞同樣發達，賽果又不相伯仲喎～

除咗運動員對運動員有睇頭，當中第三集就更加係笑料百出啦！WHIZOO Kovis對喱騷阿強，大玩概念源自於排球嘅「圓網球（Roundnet）」，一睇就知有幾gag啦～比賽分為兩隊，發球隊需用手將球拍向網內以便發球，而另一隊就要盡量唔畀個波跌落地，同時要喺3次擊球內將波打入網。因為係無邊界，想打幾高幾遠都得，所以非常講求手眼協調、靈活性同反應，先可以隨時留意同追到個波㗎！

Photo from 凝動香港體育基金

而呢兩位比較有肉地嘅參賽者，一位（Kovis）就聲稱自己玩過吓排球。

Photo from 凝動香港體育基金

另一位（阿強）就話早前減肥成功，終日流連gym房，對呢場比賽都好有信心咁話喎～

Photo from 凝動香港體育基金

片中見到兩位其實真係好落力，玩到瞓身趴地又滿頭大汗，不過最慘其實都係教練。喺最尾一個回合，兩位KOL需要喺入球前先將個波傳畀教練，但由於兩位都秉持住「打到個波就得啦」嘅信念，個波經常飛到無雷公咁遠，咁教練咪唯有下下飛身去接囉～其實透過兩位KOL嘅表演，發覺呢項運動真係好大眾化，場地唔需要太大，亦唔需要太多複雜嘅技巧都玩到，而且趣味性十足，真係唔同程度嘅人都好啱玩啊！

嚟緊都仲有兩集會有唔同嘅人上去對決，分別係空姐兼瑜珈導師——Janet同空少兼作家——細朗決戰超高難道，講求平衡感嘅雜技；

Photo from 凝動香港體育基金

同埋前香港網球一姐——Venise Chan加香港棒球代表隊——胡子彤齊齊玩旋風球（Flyball），考驗佢哋嘅反應力同把握力，有興趣嘅朋友記得逢星期二上佢哋Facebook（@ihksports）， Instagram (@ihksports) 或者YouTube鎖定節目啦～

Photo from 凝動香港體育基金

睇完咁多款新興運動，真係心思思想玩吓，其實而家運動場地都開放返，都係時候出去做吓運動，咪再懶啦～好似小編咁一樣鍾意試新嘢嘅朋友仔，以上介紹嘅新興運動的確係唔錯嘅選擇，「停課不停運動，復課活學活用」，健康先係財庫，一於約埋朋友去做運動啦！

Presented by：凝動香港體育基金