花姐曾被《勁歌金曲》監製當眾鬧爆後憤而辭職！做節目壓力大：傷害咗好多人

《全民造星》嘅監製「花姐」黃慧君參與港台節目《音樂說》時就透露之前喺TVB做導演時嘅往事，指當時被《勁歌金曲》監製當眾鬧爆感受辱後辭職。又大談做節目嘅心境，表示都有壓力，因為傷害咗好多人。

ViuTV節目《全民造星》嚟到做咗三季，唔止成功捧起MIRROR、ERROR，第三季播出後亦引起討論熱潮，幕後功臣「花姐」實在功不可沒。

Photo from 花姐IG

佢上港台節目《音樂說》時提到《全民造星》，表示一開始只係諗住做一個節目，後來被Jer（柳應廷）感動到，因為當時佢第一Round就被叮走，忍唔住喊咗，而花姐見到就覺得好唔開心，覺得個節目聲稱要幫人完成夢想，但其實係粉碎咗人哋個夢想：「我好唔開心，個節目某程度上都摧毀咗一啲年輕人。」

Photo from RTHK 香港電台

花姐回顧電視圈嘅工作經歷，佢1992年入行，由助理編導（PA）做起，慢慢升做導演。花姐指最感到挫折、失敗嘅階段，就係喺《勁歌金曲》做導演嘅時候。

Photo from RTHK 香港電台

加入節目幾年，同事都相當信任佢，直到節目轉咗監製，花姐同監製對樂壇同節目嘅睇法唔同，花姐更曾被當眾鬧爆：「你做唔到嘢！你諗法唔得！唔好得得戚戚、招招積積！」

Photo from RTHK 香港電台

性格倔強嘅花姐感被羞辱，決定辭職，佢更一度懷疑自己嘅工作能力，甚至諗過放棄。花姐表示當時自己嘅性格有啲缺憾，用溫柔啲、理性啲嘅方法溝通，可能事情就會完全唔一樣。

Photo from RTHK 香港電台

轉到去ViuTV終於做出咁成功嘅節目，花姐嘅「毒舌點評」絕對係其中一個看點。不過花姐指每次開新一季節目都感到有壓力，表示自己「真係傷害咗好多人。」

Photo from 《全民造星3》

花姐話為咗節目效果，佢作為監製，對參賽者嘅評價都非常狠，但當節目播出後，其實一定對參賽者有好大影響。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）