【消委會超市網購測試】5間網上超市購物實測！服務質素參差、錯漏百出

肺炎疫情持續，好多人都會上網購物，可以唔出街又方便。消委會早前實測5間購物平台嘅服務，不過就發現喺網站選購嘅方便程度、送貨物流安排、貨品送達時狀態幾個方面，質素參差、錯漏百出。

消委會職員以普通消費者身份，於5間本地網上超市，包括百佳、惠康、city'super、HKTVmall、big big shop，各交易5次，喺避免使用關鍵詞搜尋功能下，每次購買15件相同或同類型指定貨品，包括新鮮、急凍、預先包裝食品、日用品。

5間網上超市網站中，其中4間由選擇到最終確認落單15件目標貨品，平均需時60分鐘至98分鐘。百佳網站於完成選購及揀選送貨時段後，多次出現大量已選購貨品售罄提示，要花費額外時間搵其他代替品，其中1次實試中更有超過一半（8件）貨品售罄，另選8件代替品，其中6件又再顯示為售罄，致電客戶服務熱線查詢時對方表示所有貨品均有存貨，出錯原因不明亦未能即時解決。

Photo from HolidaySmart

喺送貨效率方面，5間超市僅city’super提供即日送貨，另外4間需時1至26日送貨，big big shop 5次交易更分開17張訂單送貨，只有4張訂單能按時送達，其餘13張訂單送貨時間比原訂早到5至16日不等，甚至有訂單最終無送貨。

今次實測5間超市嘅送貨貨品質素參差，其中1次實試city’super網購，收到1箱屬於另一客戶嘅新鮮食品，應該係超市誤將訂單對調。雖然喺第二晚補回貨品，但送達時紙箱明顯已經開過，箱內提子已腐爛、急凍肉類已解凍，同一間超市另1次實試中，訂購價值$65美國無核紅提，送貨卻為標價$47.8提子。

Photo from 百佳超級市場

其他超市送達嘅貨品亦有不同問題：「HKTVmall」 午餐肉罐頭上發現明顯凹痕；「惠康」盒裝紙巾包裝破裂；「百佳」2次實試中訂購嘅雞蛋都有破裂；「big big shop」急凍餃子已被解凍、急凍雞柳包裝已打開。

Photo from HKTVmall

網購冷藏食品、奶製品、急凍肉類等送達時，溫度較高，25次實試交易中，有24次表面溫度未達到保鮮效果，包括急凍燒賣達20.8°C、冰鮮豬扒達19.3°C、豆腐達18.6°C、鮮奶、乳酪達16°C以上。

Photo from 消委會

Big Big Shop回應指，因為疫情關係，網購需求急增，銷售量比舊年同期急增5倍，商戶及合作物流公司面對巨大壓力及挑戰，引致配送延誤及狀態欠理想。BigBig Shop對顧客引起不便致以抱歉，表示會吸取經驗，加強與商戶的溝通、更換物流公司，檢討及改善商品配送流程，增撥更多資源，改善客戶服務以減少配送延誤嘅情況。

資料來源：消委會

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）