【香港愛情故事】林景程做地產經紀入型入格！金句對白爆笑又現實

TVB《香港愛情故事》劇情貼地，劇中飾演地產經紀Henry嘅林景程演出入型入格，句句對白都係金句，搞笑又現實。網民更大讚佢以後唔做演員可轉行做地產經紀！

《香港愛情故事》開播以嚟喺香港、大陸兩地好評甚多，指劇情現實，引起唔少人共鳴。羅天宇、龔嘉欣一對情侶因為土地問題要住劏房，同地產經紀Henry（林景程飾）嘅對話夠晒貼地，林景程嘅演出亦大獲好評！

Photo from 林景程IG

佢同羅天宇、龔嘉欣夫婦一齊睇樓，全程發揮超強口才，有網民笑言佢好似開緊棟篤笑咁。

帶羅天宇夫婦睇舊樓時，龔嘉欣見個市跌咗，想買間好少少嘅樓，佢即刻話：「睇你個樣咁青春少艾，諗嘢咁鬼師奶嘅？」

Photo from 《香港愛情故事》

Photo from 《香港愛情故事》

當羅天宇、龔嘉欣預算有限但又要求多多，佢雖然帶佢哋睇大屋但就勁現實咁講「走啦！你哋買唔起㗎喇！」佢叫羅天宇降低要求租劏房，龔嘉欣即刻反對，林景程：「咁你哋無錢嘛！無錢選擇自然細㗎啦！」又勸佢哋：「買間平平哋嘅先，到時咪放（賣返出去）囉！」當對方仲猶豫時，佢更大爆金句：「你再係咁等落去，你等到佢（龔嘉欣）收經都買唔到樓！」

Photo from 《香港愛情故事》

終於帶羅天宇夫婦睇劏房，一路行樓梯一路話：「呢度啲樓梯就好好行嘅，係我行過最好㗎啦！」、佢大讚「呢個盤真係萬中無一......最重要係同黃大仙做鄰居，鄰居就梗係守望相助，你有乜法子唔好啫！」。

Photo from 《香港愛情故事》

雖然係劏房，但佢都可以講到係豪宅咁款：「正常一百呎嘅樓伸手肯定掂牆，你依家掂唔到係咪好實用？」、「平時返工、放工好攰，仲要拖地掃地，呢到想掃耐啲都無！」、「人生最花時間就係食、瞓、屙，你喺呢度轉個身乜都做到，節省人生幾多時間？」明明間屋好細都畀佢搵到優點講。

Photo from 《香港愛情故事》

佢又講到個盤好多人睇：「睇埋我schedule，陣間有幾pair人嚟睇，好搶手㗎呢度，轉個頭無㗎啦！」

到同新加坡交流生睇樓，語氣即刻180度大轉變：「周生，呢個盤真係我遇過最好，配套又正，有興趣可以買多幾套！」到一房無晒，佢即刻叫人考慮兩房單位：「560呎都係$1080萬，平均都係1萬9千幾蚊呎，你買樓都係為未來，未來佢生咗個bb，兩房單位啱啱好！」語速快到好似rap咁！

Photo from 《香港愛情故事》

林景程演地產經紀無論係神情、語氣都入型入格，對白句句都係金句！甚至有網民話：「你第時唔做演員可轉行做地產經紀！」林景程演活角色，大讚佢做小角色都好搶眼！

Photo from 林景程IG

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）