加拿大人氣冰凍髮藝大賽　邊浸溫泉邊 Set 頭！濕髮零下20度瞬間定型

天氣凍就啱就係浸吓溫泉，而每年冬季都會有唔少人會去日本或台灣玩之餘順便浸溫泉，而喺加拿大育空地區懷特霍斯嘅一間溫泉酒店，每年 12 月至 3 月期間就會舉辦「國際冰凍髮藝大賽（Hair Freezing Contest）」，畀大家喺零下20度嘅情況下邊浸溫泉邊發揮自己嘅創意 Set 番個獨一無二嘅靚頭！

依間位於加拿大育空地區懷特霍斯嘅 Takhini Hot Pools 係一間供給天然溫泉嘅溫泉酒店嚟。佢哋自 2011 年起，每年都會舉辦「冰凍髮藝大賽」（Hair Freezing Contest），令大家喺浸溫泉溫暖身體時都可以發揮自己嘅創意，實行苦中作樂。

Photo from Takhini Hot Pools/Facebook

比賽一開始時只有當地人參加，但隨住大家開心 share 依啲咁有創意嘅搞笑相之後，就吸引咁嚟自世界各地如日本以及歐洲各地嘅人專程去到當地參賽。

Photo from Takhini Hot Pools/Facebook

比賽方式好簡單，參賽者首先要將頭浸入溫泉水中，然後抬頭讓頭髮極速結冰，不滿意嘅話只要重複之前嘅步驟就可以重塑髮型，整好之後，參賽者就可以按鈴通知酒店職員拍照紀錄。參賽者只要將照片上傳至酒店 Facebook 專頁，最多人 Like 嘅一張為冠軍，可獲免費溫泉通行證及 2000 加元（約HKD$ 1 萬）。

Photo from Takhini Hot Pools/Facebook

話明係比賽當然有一定嘅規則喇！比賽規則訂明所有頭髮必須被霜凍覆蓋，即全部頭髮都變成白色嘅霜凍狀態先會被認為係合格，半冷凍嘅頭髮則唔會考慮。

Photo from Takhini Hot Pools/Facebook

酒店早前就揭曉得獎者名單，冠軍情侶以冰鬍鬚出奇制勝。

Photo from Takhini Hot Pools/Facebook

不過其他參賽作品都好有創意㗎，如有人以叉卷起冰髮扮作意粉、將冰髮與他人相連或將冰髮造成好似孔雀開屏咁，花樣層出不窮，好搞笑㗎～

唔知今年大家又會點發揮自己嘅創意，做去點樣嘅搞笑作品呢？！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）