Netflix《Bling Empire璀璨帝國》8 位富豪名媛背景起底 IG 整合 疑似造假引人睇？
Netflix 亞洲富豪炫富真人秀《璀璨帝國》 (Bling Empire)人氣極高，節目中嘅幾位富豪名媛瞬間成為話題人物，例如 Christine Chiu、Anna Shay 等，今次就為大家整合呢 8 位亞裔富豪嘅背景及 IG！
#Christine Chiu
Christine Chiu 係節目首集嘅主角，佢出生於台灣，後來移居美國，畢業於佩柏戴恩大學（Pepperdine University），23 歲時嫁畀 Gabriel Chiu，而丈夫 Gabriel 來頭亦相當顯赫，Christine Chiu 喺節目中提到丈夫係宋朝第 24 代後人，如果皇帝制度仍存在嘅話，Gabriel 就係皇位繼承人，佢哋嘅兒子就係小太子。Gabriel Chiu 係著名整形外科醫生，夫婦二人喺比華利山開設整型外科診所，專為荷李活明星、名人等提供整形服務。
#Anna Shay
Anna Shay 係節目中同 Christine Chiu 明爭暗鬥，火藥味濃。而 Anna Shay 係日俄混血，父親係已故軍火商富豪 Edward Shay，母親 Ai-San 係日本人，家族經營嘅公司專門服務政府機關。父親過世後，Anna 與弟弟拋售公司換得將近 12 億美元，兩人各分一半，所以 Anna Shay 嘅身家絕對唔係講笑。據指，Anna現時身價高達6億美元（約47億港元）。憑霸氣爽直嘅性格，被封「最霸氣的LA女王」，更收獲唔少粉絲！
#Kane Lim
Kane Lim 係新加坡富翁之子，家族喺新加坡非常出名，家族生意涉獵運輸、石油、及房地產等範疇，Kevin 喺節目中更透露 Kane 家族擁有多個新加坡及泰國嘅購物中心。不過 Kane 喺節目中曾表示自己同其他富二代唔同，因為父親從小就教佢自立，會叫佢自己搭車返學。而 Kane 過去曾喺訪問中透露自己 17 歲時問父親借咗一筆錢，開始投資，並要求自己要喺 2 個月內還返錢畀爸爸，而到佢 18 歲時，佢嘅身家已經去到 7 位數。
#Kelly Mi Li
Kelly Mi Li 係一個企業家，佢喺節目中曾透露自己 20 幾歲時嫁畀一個中國富翁，每日過住奢華嘅生活，每月豪花 40 萬，但後來丈夫被起訴涉嫌詐騙，變得一無所有。自此 Kelly 白手興家，成為成功嘅企業家。不過最近就有傳 Kelly 係節目嘅幕後導演，擔任節目嘅執行企劃，傳佢曾做過電影製片、音樂經紀人等職業，節目中嘅所有人物都係由佢拉攏出演。
#Jaime Xie
Jaime Xie 係網絡安全技術企業家億萬富翁 Ken Xie 之女，22 歲嘅 Jaime 除咗熱愛騎馬之外，仲非常時尚，身上嘅行頭全部都係當季最新款，而且經常拍攝雜誌封面，登上時裝周。
#Cherie Chan
Cherie Chan 出身豪門，而佢嘅男朋友 Jessey Lee 經營家具王國，兩人都係名門之後。Cherie 喺節目中透露自己曾經想成為日本明星，喺日本住過 2 年，並與索尼音樂公司簽約，可惜家人反對所以放棄。
#Kim Lee
Kim Lee 母親係越南人，繼父係法國人。Kim Lee 身材火辣，非常性感，係一名模特兒之外都係國際知名 DJ，每次表演都有 5 萬人觀看。Kane 喺節目中曾向 Kim 媽媽談及當佢同人講自己識得 Kim 嘅時候，其他人都會好驚訝佢同 Kim 竟然係好朋友，可見 Kim 嘅知名度相當高。
#Kevin Kreider
Kevin Kreider 係節目中唯一一個唔係出身名門望族嘅主要人物。Kevin 係一個模特兒，出身韓國家庭，細個嘅時候被白人家庭收養，相比起其他主角，佢顯得比較「窮」，節目中更常常被 Kane 取笑佢冇時尚觸覺，Anna 更為咗撮合佢同 Kelly 而叫佢任揀 Dior 衫，打算送衫畀佢。但其實 Kevin 自己創立咗一間公司 Taejin Entertainment LLC，所以比起其他主角，佢可能只係相對比較「窮」。
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
