秋冬 6 大潤喉食物　消炎止咳舒緩喉嚨痛

一到秋冬天，成日打邊爐，好易喉嚨痛，今次推介 6 大潤喉食物，可以消炎潤肺，化痰止咳，有助減輕喉嚨痛楚。

#無花果

無花果營養豐富，有「生命之果」之稱，既係水果又係中藥藥材，無花果含有胺基酸、維他命及膳食纖維等豐富嘅營養，具有消炎、消水腫、促進消化、降血壓及潤腸通便等多種功效。

Photo from Pinterest

#蜂蜜

蜂蜜相信係「潤喉聖物」，唔少人喉嚨唔舒服都會飲返杯蜂蜜水。天然嘅蜂蜜有止咳、抗氧化及消炎等功效，不過要注意蜂蜜千萬唔好用滾水沖，因為滾水會破壞蜂蜜嘅營養物質，仲會改變蜂蜜天然嘅味道。沖蜂蜜水最好就係用溫水沖飲，水溫唔好超過 60℃。

Photo from Pinterest

#白蘿蔔

白蘿蔔除咗有促進消化，清熱生津嘅作用外，仲有消炎嘅功效，可以止咳化痰，並可以舒緩喉嚨腫脹感。而且白蘿蔔仲含有豐富嘅維他命，有助增強人體免疫功能，加強免疫力。

Photo from Pinterest

#雪梨

雪梨都係舒緩喉嚨唔舒服嘅「良藥」，雪梨除咗可以養顏護膚、生津解渴之外，仲可以滋陰潤肺、止咳化痰，喉嚨痛或者有幾聲咳嗽，食返個雪梨就有助舒緩不適，或者冰糖燉雪梨都係唔錯嘅選擇。

Photo from Pinterest

#雪耳

雪耳含有豐富嘅天然膠質，有養顏美容嘅功效，而且仲可以益氣清腸、開胃補脾。此外，雪耳亦有潤肺功效，有助治理肺燥咳嗽、乾咳無痰等症狀。

Photo from Pinterest

#柚子

柚子含有豐富嘅蛋白質及維他命，有助預防感冒，促進消化。另外，柚子仲有理氣化痰、潤肺清腸嘅功效，可以緩解感冒後嘅咳嗽不適，喉嚨唔舒服有幾聲咳，可以沖杯蜂蜜柚子茶，有助潤肺祛痰。

Photo from Pinterest

喉嚨唔舒服或者有幾聲咳嗽嘅朋友可以試吓食呢啲食物。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）