Apple iOS 14.4 系統正式推出　HomePod mini 與 iPhone 交接更流暢

繼早前 Apple 公開統計數字指 iOS 14 嘅採用率比 iOS 13 高後，今日 iOS 14 又有更新喇！今次 iOS 14.4 軟件更新仲為一眾 HomePod mini 嘅用家帶嚟更流暢嘅體驗。而除咗依個功能之外，今次更新仲加入咗其他實用功能添！

HomePod mini 距離感應控制

最新推出嘅 iOS 14.4 軟件更新，為 HomePod mini 嘅「距離感應控制」功能帶來更精彩表現。HomePod mini 可與iPhone 11、iPhone 12 系列輕鬆轉移，接續播放音樂、podcast 以及電話通話，延續稱心嘅聽覺體驗。

大家只要將 iPhone 放於 HomePod mini 附近，即可接力播放音樂。過程中更帶有視覺、聽覺和觸覺嘅效果，猶如兩個裝置接連互通、音訊內容正在傳輸中的體驗。而如果 iPhone 及 HomePod mini 均冇播放緊音樂，「個人化聆聽建議」就會自動開啟，為大家提供心水音樂建議。

而除咗大家喺使用 HomePod mini 時更加流暢之後，系統中仲更新咗以下幾項實用功能：

反讀心/愉聽

相信依個功能唔少人都會好期待，其功能故名思義就係喺幫大家喺用手機時防止 App 追蹤你睇過啲咩，從而收集其個人資訊。大家喺更新後，喺首次開啟某類 App時系統就會提示詢問用家願唔願意畀 App 收集你嘅特定資訊，從中保障其個人私隱，如果同意嘅話就會出現「更好的個性化廣告體驗」，情況就類似依家嘅 Facebook，不過就畀大家更多嘅保障。

防非原廠iPhone鏡頭

依個功能喺一般情況下並唔會有任何提示畀大家，只會喺用家透過第三方維修業者或自行更換鏡頭時，手機先會出示非原廠鏡頭嘅警告訊息，並可能令鏡頭成黑畫面，嚴重者甚至會無法開啟和進行拍攝。

辨認更細 QR Code

唔少人都知 iOS 內建嘅相機可以掃描 QR Code，但只可用喺大大個嘅 QR Code 條碼上，所以今次 iOS14.4 就提升咗呢項功能，畀大家就算掃啲細細個嘅 QR Code 條碼都一樣冇問題！

支援第三方藍牙裝置

今次新增嘅依個功能可支援第三方藍牙耳機及音響喇叭嘅設定，而同時推出嘅降低高音量及即時判斷音量功能，則可按照唔同耳機或音響設備，嚟防止音量分貝太大令用戶聽覺受損。另外，大家如果使用第三方藍牙設備，可先喺藍牙設定內按「i」，然後就會見到「裝置類型」，用戶可以喺「裝置類型」內點選如汽車音響、耳機、助聽器、揚聲器等設備。

Apple Watch 步行時間

雖然目前 Apple Fitness+ 嘅訂閱服務只有美國、、加拿大、愛爾蘭、新西蘭、英國、澳大利亞等地，但今次 iOS 同 watchOS 喺更新後，大家就可以係「健身」App內新增「步行時間」功能，仲可以切換到「增加要觀看的最新鍛鍊」。

Bug 修正

每次 Apple 都會修正之前留落嚟嘅 Bug，當中就有專門針對 iPhone 12 Pro 系列拍攝 HDR 相片時出現的瑕疵；將打字出現嘅情況，如唔會出現單詞建議；喺輔助功能中，將啟用開關控制嚟阻止鎖定螢幕接聽電話功能等嘅 Bug 一次修正。

咁多新功能，唔知大家又 update 咗未呢？

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）