太古坊糖廠街市集「品茶節」必試特色茶飲及美食！附市集全年飲食主題

太古坊糖廠街市集嚟緊全年都會舉辦唔同主題嘅市集，打頭陣嘅就係3至4月舉辦嘅「品茶節」，可以食勻手工 Bagel、人氣雞翼，仲可以飲盡手沖茶、抹茶飲品！

今次嘅「品茶節」集合咗好多間知名茶店，提供多款特色茶飲及以茶入饌嘅美食，鍾意茶嘅朋友千萬唔可以錯過啊！
一齊搶先睇下有咩攤位：

茶研

「茶研」係結合傳統茶藝及現代泡茶技藝嘅茶舍，以精品茗茶為主題，同時都提供素食餐點，今次「茶研」將會提供季節限定冷泡茶──「鳳凰單欉」及「金萱烏龍」，另外，亦有各款精選茗茶例如日本宇治薄茶，配以和菓子。食素嘅朋友可以去試吓！

Winstons Coffee

「Winstons Coffee」除咗有咖啡之外，仲有咖啡雞尾酒，同時更為市集調製咗 Teapigs 人氣 CBD 冷泡茶。

圓貝

「圓貝」係香港首家以環保、健康為主題嘅素純珍珠奶茶專門店，主打健康養生珍珠奶茶，而且全部選用自家製材料。今次會提供「鴛鴦2.0」、「鳳凰茉莉米蓋」 、「菠菜芝菇饀餅」、「純素鬆餅」及牛角包等，注重養生嘅朋友可以一試！

汴京茶寮

澳門人氣茶舍「汴京茶寮」特別為市集沖泡限定「金萱烏龍」及三款限定冷泡茶包括「大吉嶺夏摘紅茶」、「靜岡手摘碾茶」及「櫻花白茶」，各位茶控們點可以錯過！

雞翼山

有得飲又點可以冇得食？人氣雞翼專門店「雞翼山」都會喺市集擺檔，仲為市集特别研製咗「伯爵茶雞翼」！

樂茶軒

「樂茶軒」除咗有罐裝「正山普洱英式啤」及「茉莉香片小麥啤」兩款茶啤外，更為市集推出茉莉花茶、桂花烏龍，仲有玫瑰普洱奶凍等多款素點心。

Brickery Bread

人氣 IG 網店「Brickery Bread」係香港本地純手工烘焙品牌，今次都會參加市集，更會為市集提供低卡低糖、健康無負擔嘅手工 Bagel。

Le Cha

「Le Cha」挑選上乘嘅茶葉及原料，製作出抹茶撻、焙茶撻、芝麻撻等口味嘅甜品，鍾意食甜品嘅朋友不能錯過！

除咗以上食店，仲有 Cupping Room 團隊嘅「Doubleshot by Cupping Room」、抹茶控必試嘅本地品牌「MATCHALI」及香港首間手沖日本茶吧「上林茶舍」等進駐市集。

糖廠街市集今年全年都會有主題市集，每兩個月就會有全新飲食主題，「品茶節」之後仲有「街頭美食」（5月3日至7月2日）、「兩極盛夏」（7月5日至8月27日）、「亞洲滋味」（8月30日至10月29日）及「咖啡節」（11月1日至12月24日），有興趣嘅朋友就要留意啦！！

2021 糖廠街市集主題

（*詳情請參閱太古坊糖廠街市集官網）

太古坊糖廠街市集「品茶節」
日期：3月8日至4月30日（星期一至五舉行，公眾假期除外）
時間：上午8時至下午3時
地點：鰂魚涌太古坊一座地下

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）