【小編試食】日本直送！！推介宇治金時煉奶刨冰雪條，濃郁抹茶味！！驚喜刨冰口感～

夏日熱辣辣歌都有得你唱啦，食下雪糕雪條消消暑，氹自己開心都好平常～小編就喺便利店揀左幾款雪條同大家試試食，今次試食嘅就係井村屋練乳刨冰雪條同井村屋 x KIRI忌廉芝士雪條～

便利店搜羅呢款日本直送刨冰雪條，有宇治金時煉奶刨冰口味同士多啤梨煉奶刨冰口味，另外再試多一款忌廉芝士雪條～單睇包裝就已經非常吸引，唔知味道係點呢？

士多啤梨煉奶刨冰口味，成份包含15%士多啤梨果汁～一打開包裝，已經聞到好大陣士多啤梨香味～

雪條食落酸酸甜甜，淺粉紅色嘅外皮有好香士多啤梨味道～而中間白色個層就好重煉奶香味，入面嘅夾心係碎冰，有少量果肉～一食落口首先會有士多啤梨嘅香，之後係煉奶嘅甜味，再加上碎冰口感，完美還原食日式刨冰嘅感覺～

宇治金時煉奶刨冰口味，雖然打開包裝未有好大陣香味～不過一見外層嘅深綠色，就估到雪條有好濃郁嘅抹茶味～

外皮係濃濃嘅抹茶，中間個層有煉奶香味，入面夾心有紅豆同碎冰～抹茶嘅香味比較濃郁，煉奶味反而無咁突出，不過最驚喜入面嘅紅豆都算原整大粒，而且幾有咬口～

呢款井村屋 x KIRI忌廉芝士雪條，外面白色嘅忌廉芝士口感非常幼滑，有淡淡嘅奶香味道，咬開中間會見到芝士夾心，帶有少少芝士咸味，芝士狂迷最啱食～呢三款雪條喺OK便利店有得買，大家快d試下啦～

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編～謝謝～）
*本文章的圖片均經其本人或其公司授權，其他媒體不得轉載