MIRROR演唱會一票難求！6粉絲被騙走近10萬元　騙徒訛稱有飛收款後即失蹤

最近嘅人氣男團絕對係 MIRROR 莫屬，早前佢哋就宣布將於下月舉行演唱會，惟開賣約 2 小時門票已火速售罄，可以話係一票難求。而近有就有 6 名粉絲被自稱與圈中人相熟嘅同事騙走 10 萬元。

MIRROR 演唱會雖然已加開至 6 場，不過依然有唔少粉絲到處撲飛，而近日就有報導指有騙徒趁機喺職場及社交網上訛稱與圈中人相熟，並且有門票出售，但喺收到錢後即失蹤疑似捲款潛逃。

Photo from MIRROR

報導中指事主與兩名騙徒係同事嚟，該兩名騙徒「表兄弟」同喺 2 月入職。事主指「表哥」成日吹噓自己曾喺英皇娛樂工作，又同著名經理人霍汶希相熟，加上「表哥」又曾聯絡上商業電台嘅 DJ，並可以比媒體早一步知道相關資訊，因此令同事對佢都冇起疑心。

而喺今次演場會，騙徒就稱自己認識 ViuTV 職員，可以取得內部門票。事主查詢時，對方一度聲稱已經冇飛，但後嚟喺官方宣布加場後，佢就再次指有飛，並可免費帶同事入場觀看 ViuTV 頒獎典禮，更叫事主唔好同其他人講。

騙徒起初向事主兜售價值 $1,980 元嘅門票，但當佢指朋友認為太貴後，就轉為推銷 $1,280 元嘅門票，並指依個價錢同樣可以入後台參觀，所以事主就一共買咗 4 張飛。

Photo from MIRROR

而事主亦喺翌日事依照對方指示入數 $5,120 元至另一騙徒「表弟」嘅戶口中，喺獲「表哥」再次確定會有飛後，便交上 4 人嘅英文全名以製作「後台證」。

可惜喺約定拎飛嘅前兩日，兩騙徒突然退出所有公司通訊群組，並且音訊全無，事主心知不妙，便向相熟嘅同事透露門票一事，並發現身邊幾位同事亦有購票，原來一共有 6 名同事曾向騙徒購票，涉約 60 張門票共涉金額近 10 萬元。

Photo from TVB

事主稱騙徒過往以「炒散」工作居多，又不時向同事聲稱二人身世可憐，故同事對佢哋照顧有加，喺二人失蹤初時大家都好擔心佢哋，但估唔到事主同同事已墮入騙局。

Photo from TVB

而其公司曾派人到佢哋嘅住所了解，但發現二人已搬走，屋內只剩垃圾。因此事主與同事最後決定報警處理，據了解目前警方已通緝相關人事，但暫未有人被捕。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）