陳瀅自認戀愛大過天願為另一半放棄事業？直言準備好隨時閃婚/生B︰可能下次見到我已經大咗肚

By Celia on 06 May 2021

Digital Editor

世界很大，生命很短，做自己就好！

最近劇接劇嘅女神陳瀅（Jeannie）可以話係 TVB 嘅力捧小花之一嚟，而日前佢就現身電台節目接受鄭裕玲（Do姐）訪問，大談自己嘅愛情觀，仲自爆已經準備好隨時閃婚生B！

Photo from missjni/IG

近日陳瀅喺鄭裕玲（Do姐）主持嘅電台節目受訪時先從其事業發展開始講起，Jeannie 指自己 2012 年喺電影《寒戰》中嘅演出係佢第一個影視作品嚟，依套戲嘅 cast 有幾勁相信睇過嘅人都知，正正因為咁而令 Do 姐驚訝︰「你第一套已經拍《寒戰》啦喎！」

Photo from Do 姐/IG

而 Jeannie 則笑指︰「我喺後面企喺度㗎咋。不過真係第一次就咁大個 cast，真係大開眼戒嘅。嗰時我係緊張到呢，我企喺度唔夠膽吸氣，呼氣我都唔夠膽，企喺度一roll機，我就閉氣，好彩個個前輩都冇乜點 NG，我閉一氣就搞掂。」佢之後仲因此而去咗北京電影學院讀咗一個暑期班進修。

Photo from missjni/IG

當然大家都知 Jeannie 係喺加拿大出生同讀書，唔少人都會好奇到底係咩令佢決定一個人留喺香港發展，佢就指一開始係因為當年曾喺香港城市大學做過一年交換生，而第一個男朋友就係當時認識：「我本身返嚟香港讀 city 係未識香港個男朋友嘅，一心係諗住感受吓香港，趁細個讀書邊度都去探索一下，讀緊書嗰陣，係真係喺香港識到一個男朋友嘅。」當 Do 姐問到當時係咪為咗對方留低，佢就直認做依個決定都有少少同對方有關，並解釋指細個始終會戀愛大過天。

Photo from missjni/IG

另外，當然唔少得講吓感情生活喇！Jeannie 出道以嚟一直緋聞多多，問到佢會唔會想大家嘅注意力放喺佢事業上多啲時，Jeannie即笑言︰「我都知道我係易惹緋聞嘅，我覺得呢一行就係『食得鹹魚抵得渴』，特別係如果單身真係冇計，我覺得自己身不由己，我每次都會去澄清嘅，但係觀眾信唔信，每個人都有佢哋自己嘅 opinion。」

Photo from missjni/IG

之後佢續又指自己真係拍拖嘅話佢會認︰「我係一個，如果我真係同依個人拍拖，我係認嘅，喺我過往，都係咁樣嘅。」但對於一啲同佢只係合作拍檔而傳緋聞，起初時佢都會澄清，但到依家佢就指自己嘅看法已經唔同咗，覺得「你鍾意啦」，因為明白大家都係鍾意睇依啲花邊新聞。

之後 Jeannie 又自爆自己已經 ready 好結婚生仔︰「我覺得我係一個幾……閃婚嘅人，可能你下次見到我，我已經大咗肚添啦。我會係你好估唔到嗰種人嚟。」

Photo from missjni/IG

因而令 Do 姐好奇問咁會唔會因為有好角色就後悔到時閃婚或者大肚，Jeannie 就指：「咁又唔會！終身大事嚟嘅，我講到好似好兒戲咁啫，我嘅意思係我 ready，其實係 ready 啦，可以結婚，可以生仔嘅。（Do姐︰但係事業呢？可唔可以並存？）我覺得都好睇我嘅對象㗎，所以要等佢出現咗先答到，我覺得如果係一個我好鍾意嘅人嘅話，都會肯去放低一啲嘢，我覺得要 balance。」

聽完 Jeannie 依個嘅答案，難怪 Do 姐都大讚佢係一個好女仔！

即睇陳瀅訪問重溫：

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

張敬軒自爆曾懷疑「遮遮」膳食好過自己　最難忘叫煮薑蔥雞腎：成碟嘢係綠色！

29 Apr 2021

張敬軒（軒仔）早前不時喺 IG 同大家分享屋企嘅外傭姐姐「遮遮」日日準備嘅早餐，並封其為「早餐界KOL」，為網民帶來無限歡樂。不過原來軒仔都同唔少傭主一樣曾經懷疑過「遮遮」嘅膳食好過自己，近日佢更喺電台節目中大爆同「遮遮」相處嘅趣事。

Photo from 張敬軒/IG

近日軒仔在鄭裕玲（Do姐）主持嘅電台節目受訪時大談「遮遮」準備嘅「精美」又清淡嘅早餐背後原因。其實軒仔指「遮遮」之前係喺台灣照顧老人家嘅，所以大多煮「糊仔」等食物，而喺 Do 姐問到軒仔最近嘅早餐有沒有新菜式時，軒仔即笑言︰「都仲係嗰幾味！」

Photo from 張敬軒/IG

因而令 Do 姐好奇指回解唔幫「遮遮」報讀廚藝課程，不過軒仔就自爆曾經有公司問佢要唔要 sponsor 課程給「遮遮」︰「但係好老實講，我覺得因為網上個分享已經變咗……大家睇到好開心啊，其實佢（工人姐姐）喺台灣做咗廿幾年。（Do姐︰煮咗廿幾年都係咁？好冇天份喎！）」

Photo from 張敬軒/IG

而當時「遮遮」亦曾因為自己炮製嘅早餐成為網絡熱話感到自責，仲拎住 cap 圖問軒仔佢係咪做得唔好︰「其實佢都唔好意思㗎，佢揸住個 IG cap 圖，係佢前僱主個孫女 send 畀佢，仲同佢講『你咁樣唔得㗎，你幫 Mr. Cheung 手你要做好啲啊』，所以佢就揸住個 cap 圖嚟問我『其實我係咪做得唔夠好？』，我話唔係啊唔係啊，你唔好以為我攞你出嚟祭旗。」

Photo from 張敬軒/IG

之後軒仔又揭露指佢依啲早餐背後嘅另一個原因：「佢煮呢啲多士啊，佢同我講，佢話其實因為佢咁多年，佢覺得咁樣嘅早餐已經好豐富，咁我覺得我哋喺呢個城市，我哋慣咗咁樣生活，其實可能對於好多人嚟講，有時連早餐都未必 afford 得到，或者可能食得都冇咁好，所以我希望呢啲 post 可以起到雙面嘅 reflect 嘅作用，話畀大家聽我哋都應該覺得滿足，又或者有啲朋友屋企，你覺得你姐姐（廚藝）唔好嘅時候，你睇吓我呢個！」

Photo from 張敬軒/IG

其中令佢最難忘嘅雖然係叫「遮遮」煮雞腎，佢指佢試過有一次喺屋企食飯，「遮遮」就問「阿 sir 你今日想食咩？」』，當時軒仔就話想食薑蔥炒雞腎，仲教埋佢點煮，喺邊度可以買到同買幾多，點知當晚軒仔喺食飯時見到一碟綠色嘅薑蔥炒雞腎，軒仔解釋：「其實佢將一個腎切開兩邊，然後加咗好多蔥落去炒，所以成碟嘢都係綠色，多到可以送飯，而我就要喺啲薑蔥入面搵返嗰幾粒雞腎出嚟。」

Photo from 張敬軒/IG

此外，軒仔又自爆以往一直有同工人姐姐同枱食飯嘅習慣，但依位「遮遮」就不太習慣，於是大家分開食飯，所以軒仔每個月都會給她「food allowance」：「我就睇吓（佢食乜），因為好多人都話佢哋食啲嘢係好過個僱主食啲嘢，唔係嘅，佢自己食啲嘢都好得人驚嘅！都各有各得人驚，所以我覺得其實佢整俾我嗰啲都算係咁。」